ni Nitz Miralles @Bida | Jan. 22, 2025
Always welcome sa mga fans ang mga bagong showbiz relationship, kinikilig sila at marami agad silang reaksiyon.
Ganito ang nangyari kina Mavy Legaspi at Ashley Ortega na newest showbiz couple raw.
Spotted sa Cebu sina Mavy at Ashley at nakunan ng photo na magka-holding hands. Ang dating agad sa mga fans, magdyowa na ang dalawa dahil hindi raw sila magho-holding hands kung nasa ligawan stage pa lang ang kanilang relasyon.
Marami agad ang nagpahayag na pabor sila sa relasyon ng dalawa. May mga shippers na ang tawag sa sarili ay “AshMav”. May mga comments sa Instagram (IG) ni Mavy na: “Bagay kayo,” “Nakakakilig,” “Perfect match,” “Good choice, Mavy, mas bagay kayo,” “You deserve to be happy,” “Maganda at guwapo, bagay kayo!”.
Soft launch daw sa relasyon nila na makitang magkasama sila sa Cebu at ‘yung isang picture na magkatabi na nga sila, nakaakbay pa si Ashley kay Mavy.
Ang pag-amin na lang ng dalawa ang hinihintay ng mga fans, pati ng mga non-fans.
Dapat wala nang bashing kung may bagong girlfriend si Mavy dahil matagal na silang break ni Kyline Alcantara. In fairness, naunang magka-BF si Kyline at ‘yun nga ay si Kobe Paras na mabilis ding tinanggap ng mga fans.
Matagal na ring single si Ashley. Ang mayor pa yata ng Lucena City ang last BF niya, kaya may karapatan din siyang magmahal uli.
Pakinggan kaya ng GMA ang request ng AshMav fans na pagsamahin sa isang teleserye sina Mavy at Ashley? Mas maganda raw kung rom-com ang ibibigay sa dalawa at lagyan ng maraming kilig scenes para sila’y kiligin.
Nagagawa na ‘yung mga ‘di nagagawa noon…
BARBIE, TODO-ENJOY NA WALA NA SI JAK SA BUHAY NIYA
Pati kami ay nabudol sa headline ng isang post sa X (dating Twitter) na, “Just in: Barbie Forteza and Jak Roberto in Sinulog.”
Ang nasa picture lang ay sina Jak, Gab Valenciano at Dominic Roque na nakasakay sa float ng Wheeltek sa katatapos na Sinulog Festival sa Cebu.
Hinanap namin sa float si Barbie at baka nga kasama siya, pero wala kaming nakita. ‘Yung kasamang girl ng tatlo sa float ay hindi si Barbie, kundi si Jet Lee na guest din ng Wheeltek sa event.
Finally, nakita rin namin si Barbie, pero wala siya sa float, nasa billboard siya ng isa niyang endorsement na tamang-tama sa anggulo ng kuha ng larawan na nasa bandang ulo siya ni Jak. Natawa na lang ang mga kagaya naming nabudol sa headline na in fairness, masaya. At least, kahit sa litrato at kahit nasa billboard si Barbie ay nakita silang magkasama ni Jak.
And speaking of Barbie, ine-enjoy nito ang pagiging single, ginagawa ang mga bagay na hindi niya ginagawa dati gaya ng pagdya-jogging.
Madalas makita si Barbie with her friend at kapwa Kapuso star na si Raine Matienzo at ang mas nagpalalim sa friendship nila ay dahil pareho silang fans ni Taylor Swift.
MARAMI ang nag-agree sa naging pahayag ni Rosanna Roces tungkol sa security guard na nawalan ng trabaho pagkatapos mag-viral ang paninita sa isang Sampaguita vendor.
Sabi ni Rosanna, “Du’n tayo sa Guard, nagtatrabaho ng legal ‘yan, hindi nagpapanggap na guard lang. No to palimos at iba pang uri ng panloloko,” na ang tinukoy ay ang Sampaguita Girl na inakalang high school student, pero college student na pala.
Nanawagan ng tulong si Rosanna para sa guard.
“Tulungan natin si Guard… kawawa, may pamilya ‘yan,” ayon pa kay Rosanna.
Nagpatulong din si Rosanna sa radio host na si Morly Alinio na tulungan siyang hanapin ang guard para mabigyan ng suporta.
Nanawagan din ang mga netizens sa agency na may hawak sa guard na pabalikin ito sa trabaho at masusing i-review ang insidente.
May mga panawagang, “Kay Guard tayo!” at mga panawagang sana, may mga tumulong sa guard na magkaroon uli ng trabaho.
Comentários