ni Reggee Bonoan @Sheet Matters | February 16, 2023
Successful ang bagong seryeng FPJ’s Batang Quiapo sa una at ikalawang episode na napanood nitong Lunes (Pebrero 13) at Martes (Pebrero 14).
Pinuri ang lahat ng bumubuo sa Batang Quiapo sa napakagandang pagbubukas nito at talagang humataw ito sa pinagsama-samang ratings ng Kapamilya channels, A2Z, TV5 at iba pang platforms.
Viral si Miles Ocampo sa napakahusay nitong eksenang nireyp siya ni Coco Martin at ang panganganak niya sa palengke. Ang husay naman kasi.
Kaya nga sabi ni Direk Coco sa galing na ipinakita ni Miles, sana ay may magbukas ng bagong opportunity dito dahil sayang ang talento nito, na totoo naman.
Anyway, sa kabila ng kaliwa’t kanang papuri sa buong team ng Batang Quiapo ay hindi maiiwasan na may mga mababasang hindi maganda tungkol sa mga eksenang para sa iba ay maaaring hindi nila gusto dahil sa magkakaibang paniniwala, lalo na sa larangan ng relihiyon.
Hindi nagustuhan ng mga kapatid nating Muslim ang eksenang hinahabol ng mga pulis ang karakter ni Coco bilang si Tanggol dahil nang-snatch ng kuwintas at sa bahay ni Rez Cortez bilang Muslim siya pinatuloy.
Ayon sa sinabi ng pulis na humahabol ay hindi na nila mahuhuli pa si Tanggol dahil nasa poder na ito ni Rez. Kasunod nito ay may isang karakter din na may hawak na armalite ang nagsabing wala na ang mga pulis at nakaalis na.
Sa madaling salita ay inalmahan ng mga Muslim ang eksenang ito dahil taliwas ito sa turo ng Islam na kumakandili sila ng magnanakaw dahil misleading daw ito.
Viral ito sa Facebook account ng may pangalang Sohaimen M. Agal kung saan itinag nito ang mga kapwa Muslim at may panawagan pa sa mga kapwa nila Muslim na iboykot ang programang FPJ’s Batang Quiapo.
Base sa post ni Sohaimen, “Panawagan sa mga kapwa kung Muslims para i-Boycott itong show FPJ's Batang Quiapo. Kahit kailan ay hindi kino-konsente ng Islam ang pagnanakaw. Ito ay mahigpit na ipinagbabawal ng Islam. Sinabi ng Allah sa Qur'an (translated in Filipino ang pagkakasulat sa Arabic) 'Ang mga magnanakaw, lalaki man o babae, puputulin ang kanilang mga kamay bilang kabayaran sa kanilang ginawa. (Qur'an 5:38)'"
“At nabanggit sa isang Hadith, Sahih Bukhari Wa Muslim, kung saan ang Propeta Muhammad Sumakanya nawa ang kapayapaan at pagpapala, ay sumumpa sa Allah, na kung sakaling nagnakaw si Fatima, ang kanyang anak, tiyak na ipapaputol nito ang kanyang kamay.
“Misleading po ang Episode ng FPJ's Batang Quiapo kagabi (Martes). Very opposite sa teaching ng Islam ang ipinakita nila, kung saan okay lang daw na magnakaw si Coco Martin basta't ginagamit niya ito sa pagtulong sa mga tao! Kapag habulin pa daw siya ng police sa susunod, takbo lang daw ito sa kanila! Kailan pa naging tama ang mali, ABS-CBN?
“Ano ‘yun? Ipino-portray nila na ang mga Muslim sa Quiapo ay takbuhan at protector ng mga magnanakaw? Ng mga masasamang tao? Ng mga basagulero? Tapos sinabi pa ng police na "Tara, umuwi na tayo, mahirap nang makapasok d'yan.' Ano'ng ibig sabihin noon, mga #FPJsBatangQuiapo writers? What are you insinuating? Hindi lang ito ang una, kundi ilang beses na po naming napatunayan na biased kayo when it comes sa aming mga Muslims."
Nagpadala kami ng mensahe sa Corporate Communication para sa sagot tungkol dito pero hanggang natapos na naming isulat ang balitang ito ay hindi pa kami nababalikan.
Tinext din namin si Direk Malu Sevilla bilang isa sa direktor ng FPJ’s Batang Quiapo at hindi rin kami nasagot pa.
Comments