ni Ryan Sison @Boses | Mar. 3, 2025
Inanunsyo kamakailan ng Department of Public Works and Highways – National Capital Region (DPWH-NCR) ang pagsisimula ng rehabilitasyon ng EDSA, kung saan isa sa mga pangunahing hakbang ay ang pansamantalang pagsasara ng bus lane.
Bagama’t tila ito ay isang makabuluhang proyekto na naglalayong gawing mas matibay ang pangunahing lansangan ng Metro Manila, marami ang nangangamba sa matinding epekto nito sa daloy ng trapiko at pang-araw-araw na buhay ng mga commuter.
Ayon sa isang opisyal, makikipagtulungan ang ahensya sa Department of Transportation (DOTr) at Metropolitan Manila Development Authority (MMDA) upang mapagaan ang abala sa trapiko. Ngunit sa kabila ng mga pangakong ito, hindi maikakaila na malaki ang magiging epekto ng naturang pagsasara, lalo na sa mga commuter na umaasa sa bus lane para sa mas mabilis na biyahe. Kung isasara ito, saan lilipat ang mga bus, at paano maiiwasan ang pagsisikip ng trapiko sa ibang linya?
Ang proyektong nagkakahalaga ng P7.3 bilyon ay nakatakdang tumagal ng isang taon bilang paghahanda sa ASEAN Summit 2026. Bagama’t mahalaga ang pagpapanatili ng mga pangunahing kalsada, dapat pag-isipang mabuti kung paano ito isasagawa nang hindi nagdudulot ng mas malaking sakripisyo sa publiko.
Ang kasaysayan ng mga infrastructure projects sa bansa ay puno ng pagkaantala at hindi natatapos sa takdang oras. Kaya’t hindi maiiwasan na may mga nangangamba na baka ito ay maging panibagong pasakit sa halip na solusyon.
Nararapat lamang na tiyakin ng DPWH, MMDA, at DOTr na may malinaw at epektibong plano sa traffic management bago ipatupad ang pagsasara ng bus lane. Hindi sapat ang pangakong “gagawa ng paraan”, dapat may konkretong alternatibo upang hindi magdusa ang mga commuter at motorista.
Kung hindi ito mapapamahalaan nang maayos, ang rehabilitasyon ng EDSA ay maaaring maging panibagong halimbawa ng isang proyektong may magandang layunin ngunit nagdulot lamang ng dagdag na problema.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com
Comments