ni Erlinda Rapadas @Teka Nga | June 7, 2023
May ilang fans ni Ice Seguerra ang nagwi-wish na sa bagong show nina Tito Sotto, Vic Sotto at Joey de Leon ay maisama ang kanilang idolo.
Nami-miss na kasi ng mga ito si Ice at alam nilang magiging asset din ito sa anumang show na kabibilangan ng singer-songwriter.
Bukod sa talento nito sa pagkanta, bihasa na rin sa hosting si Ice. At alam naman ng lahat na nakasama siya ng TVJ sa ilang comedy films na ginawa ng tatlo noon.
Maging si Julia Clarete na matagal ding naging bahagi noon ng Eat… Bulaga! ay hinihiling din ng mga fans na maisama sa bagong show ng TVJ.
Nasa Pilipinas na uli si Julia at noong 70th birthday ni Superstar Nora Aunor ay natanong namin kung gusto pa ba niyang bumalik sa pagho-host ng noontime show at nag-yes naman siya rito.
Well, tiyak na magiging masaya ang bawat araw ng bagong show ng TVJ kasama ang mga Dabarkads.
Siguradong ibibigay ng kanilang mga loyal viewers ang buong suporta sa tatlo. Daragsa rin ang mga advertisements at commercials kapag nagsimula nang umere ang show ng TVJ.
Nagpahayag na rin ng suporta sa TVJ ang mga malalaking advertisers na ilang taon na nakasama ng EB!.
Para sa mga ito, kung nasaang network ang bagong show ng TVJ ay doon din sila lilipat at susuporta.
Comentários