ni Mercy Lejarde @Showbiz Talkies | September 21, 2023
Bago gumawa ng kasaysayan bilang unang Filipina na naging nominado sa British Academy of Film and Television Arts o BAFTA at Golden Globe Awards, iba't ibang trabaho rin ang napasukan ng aktres na si Dolly de Leon.
Sa episode ng Magandang Buhay nitong Martes, naikuwento ni Dolly na naging mascot siya para sa mga malalaking events.
"Minascot ko, baka (cow). Pero dalawa kami, ako 'yung nasa likuran, tapos, 'yung kasama ko, siya ‘yung nasa harapan. So, nakakapit ako sa hips niya, tapos, 'yung likuran niya ay nakaharap sa akin, tapos, sumasayaw kami. Masaya 'yun, masaya," ani Dolly.
Bukod doon, naibahagi rin ng premyadong aktres na naging babysitter rin siya, “Pamangkin ko rin, bine-babysit ko pero may bayad ‘yun, trabaho siya."
Sa programa, nagbalik-tanaw si Dolly sa pagsisimula ng kanyang karera. Ayon sa premyadong aktres, nag-aaral pa lang siya sa University of the Philippines (UP) nang magsimula siyang umarte.
"Sophomore pa lang ako, lumalabas na ako sa mga sitcom, drama anthology at kasabayan ko sina Uge (Eugene Domingo) at sina Candy (Pangilinan). Doon ako nag-start sa mga sitcom," ani Dolly na inaming bata pa lang siya ay pinangarap na niya ang pag-arte.
"Acting talaga ang gusto ko nu’ng bata pa ako pero never ko talaga siyang pinursue nu’ng una, lalo na nu’ng pag-graduate ko ng college kasi matumal ang trabaho, konti lang ang pumapasok na trabaho. So gumawa ako ng iba't ibang bagay para maituloy ko pa rin ang passion ko which is acting. Kaya ako nag-cashier, kaya ako nag-mascot at lahat," paglalahad ni Dolly.
Ayon pa sa premyadong aktres, ang kauna-unahang pelikulang ginawa niya ay ang Shake, Rattle and Roll III na idinirehe ni Peque Gallaga.
"Ang big deal nu’n, si Manilyn Reynes ang bida. Tungkol 'yun sa undin. Isa ako roon sa boarders na barkada ni Ai Ai delas Alas dahil siya 'yung kontrabida roon, kami 'yung mean girls, inaapi-api namin si Mane. Isa kami sa pinatay ng undin," kuwento ni Dolly.
Ang proyektong hindi raw malilimutan ni Dolly na kanyang ginawa sa TV ay ang The Maricel Drama Special.
“Kasi kaeksena ko si Maria (Maricel Soriano), siyempre, intimidated na intimidated ako sa kanya.
Nakakatuwa doon, ‘di ba, usually kapag darating ka sa set, magri-reading muna sa iyo ang AD (assistant director), ‘di ba? Para itse-check nila kung alam mo ang lines, kung marunong kang umarte, parang 'yun na ang audition mo.
“So nu’ng ginawa namin 'yung lines, reporter ako roon, 'yun ang role ko, ini-interview ko siya (Maricel). Nu’ng ginawa ko ang lines, okay, ang ganda, ang linis, pulido. Tapos, nu’ng dumating na si Ms. Maria on set, tapos, action na, wala na, nadapa-dapa na ang lines ko, ang pangit, nakakahiya. Mabuti na lang at mabait siya, hindi naman niya ako pinagalitan or anything, patient naman siya," pagbabahagi pa ng premyadong aktres.
Hindi rin makakalimutan ni Dolly ang pagiging kontrabida sa programang Precious Hearts Romances: Pintada noong 2012.
"Parang feeling ko, 'Wow! Breakthrough ko na ito,’ kasi kontrabida. Kapag kontrabida ka, parang big deal ‘yun, eh. Ang kaeksena ko roon si Denise Laurel," aniya.
Kahit na malilit na karakter ang kanyang mga ginagampanan, hindi naisip ng premyadong aktres na iwanan ang pag-arte.
"Kasi tanggap ko na ganu’n ang destiny ko as an actor. Para sa akin, as long as kinukuha ako para magtrabaho, hindi na importante ang role na gagampanan ko. Basta may trabaho, go ako.
Saka 'di ko iniisip 'yun na walang linya. Para sa akin, hindi naman 'yun problema, para sa akin, okay nga 'yun, at least, nagtatrabaho pa rin at 'yun naman ang importante," pag-amin ni Dolly.
Bida sina Dolly at Kathryn Bernardo sa upcoming movie na A Very Good Girl na ipapalabas sa mga sinehan sa Setyembre 27.
Comments