ni Anthony E. Servinio @Sports | April 6, 2023
Nag-uwi ng dobleng tagumpay ang De La Salle University-Dasmarinas Patriots at Lady Patriots sa pagpapatuloy ng 29th National Capital Region Athletic Association (NCRAA) Basketball Tournament noong Lunes sa Pablo R. Olivarez Coliseum sa Paranaque City.
Hindi nagpahuli ang host Olivarez College Sea Lions at nanatiling malinis sa pitong laro matapos patahimikin ang Bestlink College of the Philippines Kalasag, 111-80.
Naging mas matatag sa huli ang Patriots laban sa Asian Institute of Maritime Studies Blue Sharks, 80-77, para umangat sa 2-3. Ibinalik ng shoot ni Paul delos Santos ang lamang sa DLSU-D, 78-77, at 27 segundo sa orasan.
Biglang tinawagan ng unsportsmanlike foul si Josea Mananquil ng AIMS at sumandal ang Patriots sa mga free throw nina Shan Vesagas at Ronroy Bunda upang manatili ang resulta. Nanguna si Vesagas na may 20 at sinundan ni Bunda na may 19 puntos.
Sumosyo ang defending champion Lady Patriots sa liderato ng Women’s Division sa bisa ng 97-84 tambak sa Bestlink Lady Kalasag sa likod ng 20 puntos ni Gabrielle dela Cuesta.
Umarangkada para sa huling 14 puntos ng third quarter ang DLSU-D para sa 78-59 lamang at hindi na binitawan ito para sa karadang 2-0 katabla ang nagpapahingang Polytechnic University of the Philippines Lady Radicals.
Sinikap ng Olivarez na tapusin agad ang Kalasag at humataw sa first quarter, 37-18, at tuloy-tuloy ang buhos hanggang lumobo sa 109-76 ang lamang papasok sa huling tatlong minuto. Pitong Sea Lion ang may 10 o higit na puntos sa pamumuno nina John Anthony Umali na may 15 at Hanz Maycong at Best Player Michael Joseph Homo na parehong may 13 puntos. Sa unang laro, napigil ng PATTS College of Aeronautics ang huling paghabol ng Emilio Aguinaldo College-Cavite, 69-61.
Comments