'Di na kinaya ang banat ng netizens… BUBOY, NAG-RESIGN AGAD BILANG KAPALIT NG TVJ SA EB!

ni Erlinda Rapadas @Teka Nga | June 12, 2023

May emote ang Kapuso actor na si Buboy Villar na isa sa mga hosts ng bagong Eat… Bulaga!.

Tahimik daw kasi dati ang buhay niya sa nakaraang limang taon, pero biglang nagulo at nabulabog nang tanggapin niya ang offer ng TAPE, Inc. na maging isa sa mga kapalit nina Tito Sotto, Vic Sotto at Joey de Leon para sa kanilang bagong EB!.

Tulad ng mga kasamahan niya sa nasabing programa na sina Paolo Contis at Betong Sumaya, na-bash din nang husto si Buboy. Marami raw itong kapalpakan na ginawa sa bagong EB! at walang “K” na mag-host.

Kaya, nagdesisyon na raw si Buboy na mag-resign na sa nasabing programa. Pero ‘di naman siya agad-agad na aalis sa bagong EB!. Hihintayin muna niyang makahanap ng papalit sa kanyang posisyon ang TAPE, Inc.

Kahit na aalis na siya bilang host ng bagong EB! ay may pagkakaabalahan pa rin si Buboy dahil kasama siya sa upcoming series nina Marian Rivera at Gabby Concepcion na Against All Odds.

Sa ngayon, si Buboy din ang tumatayong co-host ni Super Tekla sa comedy talk show na The Boobay and Tekla Show habang pinagpapahinga muna si Boobay ng GMA-7 dahil sa kanyang karamdaman.