ni Maestro Honorio Ong @Kapalaran Ayon Sa Numero | August 26, 2024
Dear Maestro,
May dyowa akong tomboy, at okey naman ang pagsasama namin.
Maestro, nais ko sanang malaman kung panghabambuhay na ba ang aming relasyon kahit na marami ang kumokontra sa amin?
Dati na akong nagkaroon ng nobyo, pero niloko niya lang ako. Kaya naman talagang masasabi ko ngayon na mas maligaya ako sa kasalukuyan kong dyowa.
Inaaaya na niya akong magsama, tutal pareho naman kaming may work, para hindi na umano kami magkahiwalay pa.
Dapat ba talaga akong makisama sa kanya? Siya na rin kaya ang makakasama ko habambuhay?
Isa akong Aries na isinilang noong April 9, 1998, habang isa naman siyang Scorpio na isinilang noong November 12, 1997.
Umaasa,
Erika ng Bambang, Bocaue, Bulacan
Dear Erika,
Sadyang malaki ang posibilidad na kayo na nga ang magsama habambuhay.
Sapagkat, ayon sa Depth Astrology o angtinatawag nating malalimang pagsusuri ng mga planetang nagkukubli sa bawat zodiac sign, tunay ngang ang Aries na zodiac sign mo ay nagtataglay ng ruling planet na Mars, tulad ng ruling planet ng Scorpio na nagtataglay din ng planetang Mars.
Ibig sabihin, tunay ngang magkaparehong planeta ang umiiral sa inyong kapalaran, kaya madali kayong pinagtagpo ng tadhana, at pagkatapos pagtagpuin ay naghigupan ng damdamin at lakas. Dagdag dito, masasabi ring madali kayong nagkaroon ng kakaibang atraksyon sa isa’t isa na maaaring sa bandang huli, kayo na nga ang magkatuluyan at magsama habambuhay, kahit sabihin pang parehong kayong babae sa pisikal o panlabas na anyo.
Samantala, sa pangkalahatang obserbasyon pangkaraniwan na ang inyong relasyon. Alam naman nating lahat at madalas din naman nating sabihin na nakakapagtakang nagiging ka-compatible ng isang Scorpio ang halos lahat ng zodiac sign.
Dahil para sa isang Scorpio, walang ibang mas mahalaga kundi ang unique, kakaibang panlasa sa larangan ng relasyon at kakaibang panlasang sekswal. Kung saan sa kaibuturan ng kanilang pagkatao, sa ganu’ng kakaiba at ‘di pangkaraniwang relasyon sila tunay na lumiligaya at nasasarapan.
Dagdag pa rito, nagkataon din ang birth date mong 9 ay katugma ng birth date na 12 o 3 (ang 12 ay 1+2=3) ng dominanteng karelasyon mo dahil ang inyong mga numero ay parehong napapabilang sa series of 3-6-9.
Kung ang karelasyon mo ay may kayumangging kulay ng balat na siyang madalas makahigop o makaakit ng mga isinilang sa zodiac sign na Aries, at madalas ding gumagamit ng pula, itim at nagsusuot ng sumbrero o cap. Tiyak na ang magaganap, marami man ang kumontra sa relasyon n’yo, wala silang magagawa dahil sa bandang huli, iiral pa rin ang pagiging magka-compatible n’yo kaya walang puwersang makakahadlang sa inyong pagmamahalan. Dahil dito, panghabambuhay na kayong magsasama na para bang isang tunay at totoong mag-asawa.
Comments