ni Ador V. Saluta - @Adore Me! | June 5, 2022
Dahil sa kasong pambubugbog sa sexy star na si Ana Jalandoni, maraming oportunidad ang nasayang para sa aktor na si Kit Thompson.
Dalawa sa malalaking proyekto ang umatras na kunin ang Kapamilya actor dahil sa kinakaharap pa ring kaso.
Malapit nang umere ang Flower of Evil starring Piolo Pascual at first-ever series ni Lovi Poe sa ABS-CBN simula nang siya'y lumipat sa istasyon at kabilang sana si Kit sa malaking project na ito sa pakikipag-collaborate ng ABS-CBN with Viu.
Sa Facebook page na JC de Vera last April 18, inanunsiyo na si JC na nga ang kapalit ni Kit sa nasabing serye.
At nitong Mayo 16 lamang, naglabas ang Dreamscape Entertainment ng teaser ng Flower of Evil kung saa'y si JC ang isa sa cast ng programa na shinare rin agad ng aktor sa kanyang Facebook account.
Labis na ipinagtaka ng ilan dahil alam nilang si Kit ang original third wheel sa Piolo-Lovi love affair sa suspense-drama thriller series.
Nitong Biyernes (Hunyo 3), ini-announce naman ni Direk Chris Cahilig sa Facebook na tuloy na tuloy na ang streaming ng digital series na Ang Babae Sa Likod ng Face Mask simula sa Hunyo 11, Sabado, sa Puregold Channel sa YouTube.
Ito dapat ang unang project na pagsasamahan nina Kit at Herlene "Hipon" Budol na dahil din sa hatid na 'malas' ng Kit-Ana controversy, napunta kay Joseph Marco ang nasabing role.
Noon pa raw Marso 26 (Sabado) at 6:00 PM ang pilot streaming ng Ang Babae... ayon sa Puregold Channel, pero dahil din sa isyung pambubugbog ni Kit noong March, hindi natuloy ang streaming ng nasabing digital rom-com series na idinirek ni Victor Villanueva.
Isa pang 'malas' na masasabi for Kit ay wala pa ring nakatakdang streaming sa Upstream ang huling pelikulang ginawa niya, ang Runaway kasama si Maureen Wroblewitz na on location pa naman sa New Zealand, noon pang September 3, 2021.
Nakatengga pa rin hanggang sa ngayon ang Runaway dahil sa kinakaharap pa ring isyu ni Kit.
Comments