Dahil sa dami ng kaso ng COVID-19… 4 na bansa, inilagay ng Pilipinas sa ‘Red List’

ni Jasmin Joy Evangelista | September 19, 2021

Inilagay ng Inter-Agency Task Force (IATF) sa "Red List" ang mga bansang Grenada, Papua New Guinea, Serbia at Slovenia dahil itinuturing ang mga ito na COVID-19 high risk areas.

Ayon sa Malacañang, mananatili sa Red List ang mga bansang ito mula Setyembre 19 hanggang 30.

Nauna nang inilagay sa Red List mula September 12 hanggang 18, ang mga bansang Azerbaijan, Guadeloupe, Guam, Israel, Kosovo, Montenegro, North Macedonia, Saint Lucia at Switzerland.

Ayon sa datos, lumalabas na mayroon itong mahigit 500 COVID-19 cases per 100,000 population sa nakalipas na 28 araw.

Dahil dito, hindi papayagang bumiyahe sa Pilipinas ang mga tao mula sa apat na bansang ito, maliban kung mga Pilipino na sakay ng repatriation o special commercial flights.