ni Nancy Binay - @Be Nice Tayo | June 2, 2022
Good news para sa ating mga guro at iba pang nagsilbing poll worker nitong nakaraang halalan.
Pasado na sa Senado Senate Bill No. 2520 na nilalayong amyendahan ang National Internal Revenue Code upang gawing tax-exempt ang honoraria, travel allowance at iba pang benepisyong ibinibigay ng Commission on Elections sa mga poll worker.
Nasa 20 percent ang tax na ikinakaltas sa election service pay ng mga poll worker.
Ayon sa Department of Education, halos 650,000 ng empleyado nito ang naglingkod sa Halalan 2022. Kasama ang nasa 319,317 public school teachers na nagsilbing miyembro ng electoral board.
Umaasa tayong sa lalong madaling panahon ay maisabatas na ang panukalang ito.
☻☻☻
Noong Lunes ay pinarangalan natin ang 2019 The Outstanding Women in the Nation’s Service o 2019 TOWNS Awardees.
Sa pamamagitan ng Senate Resolution No. 218 ay nagbigay-pugay tayo sa mga kababaihang naglingkod-bayan at nagsilbing inspirasyon sa mga kababayan natin.
Napapanahon ang pagpupugay sa kanila upang maging paalala sa ating mga bagong halal na opisyal na isaalang-alang parati ang serbisyo at pagbibigay-pag-asa sa ating mga kababayan.
Sa ating 2019 TOWNS Awardees: Xyza Bacani, Carmina Bayombong, Clarissa Isabelle Delgado, Maria Regina Justina Estuar, Karla Patricia Gutierez, Samira Gutoc, Dr. Gay Jane Perez, Atty. Patricia Ann Prodigalidad, Stephanie Sy, Rohaniza Sumndad-Usman, Chiara Zambrano, at Dr. Geraldine Zamora, congratulations muli!
Nawa’y hindi kayo magsawang maglingkod sa bayan.
☻☻☻
Paalala lamang sa lahat na patuloy pa ring mag-ingat sa paglabas ng bahay, magsuot ng facemask, ugaliing maghugas ng mga kamay, bigyang-halaga ang kalusugan at huwag kalilimutang magdasal.
Malalagpasan din natin ito.
Be Safe. Be Well. Be Nice!
Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.
Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US! Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay
Comments