ni Jemuel C. Salterio @Talbog | Oct. 24, 2024
Ang sarap makitang muling magsasama-sama ang iconic ‘90s dance group na Streetboys na balik-eksena na para magpasiklab sa kanilang 31st anniversary reunion concert sa New Frontier Theater sa Quezon City ngayong Nobyembre 8.
Sa isang event recently, pinakilig nina Vhong Navarro at Jhong Hilario ang audience nang maki-jam kasama sina Danilo Barrios at iba pang members ng grupo. Sumayaw sila ng dance medley bilang patikim sa mangyayaring pagsasama-sama nilang muli.
“We will all dance together,” sabi ni Vhong, na kitang-kita ang energy at galaw na walang kupas kahit nag-perform pa siya sa event.
Ang pinaka-highlight? Kumpleto ang Streetboys sa reunion concert na ito!
Galing pa sa iba't ibang sulok ng mundo ang ibang miyembro. Sina Spencer Reyes at Michael Sesmundo mula London, si Joseph De Leon mula Dubai, at si Sherwin Roux mula Canada.
“Lilipad silang lahat para makumpleto kami. Para sa inyo ‘to!” dagdag ni Vhong.
Ang concert na ito ay produced ng Alcasid Total Entertainment and Artist Management Inc. (A-TEAM), na pag-aari ni Ogie Alcasid.
Ayon kay Ogie, hindi lang Streetboys ang magpe-perform, may special guests din mula sa ‘90s na siguradong ikatutuwa ng mga fans.
“Very exciting. Tuluy-tuloy na. Last year, plano na namin 'to pero hindi natuloy. Pero ngayon, it’s finally happening, all in God’s time,” kuwento ni Ogie.
Si John Prats ang magdidirek ng concert.
Ayon kay Ogie, “Nasa dressing room ako, narinig ko sina Jhong at Vhong, tapos sabi ko, ‘Ako na ang magpo-produce!’ Akala nila, nag-joke lang ako, pero sinimulan ko na agad ang usapan kay Direk Chito (Roño).”
Sa ginanap na mediacon, nag-share ng throwback stories ang mga members ng Streetboys lalo na during their struggling years.
Kuwento ni Jhong Hilario, when they were starting, inaabot sila ng twelve hours or more sa rehearsal. Minsan, kahit walang kuryente, magtitirik ng kandila makapag-rehearse lang.
Inaabot daw sila ng gutom at pagod at abonado pa nga sa pamasahe, pero hindi naman sila makapagreklamo kay Direk Chito Roño na manager nila.
But everything paid-off nang sumikat na ang grupo at tumatak nga ang kanilang pangalan sa industriya.
Pagkatapos ng disbandment ng grupo, iba’t iba ang landas na tinahak ng mga miyembro. Si Vhong Navarro ay naging matagumpay na TV host at aktor sa It’s Showtime, habang si Jhong Hilario ay pumasok sa pulitika at nanalo bilang konsehal ng Makati. Si Danilo Barrios naman ay tahimik na namuhay bilang negosyante, at si Spencer Reyes ay nagtatrabaho bilang bus driver sa London.
Sa reunion concert na ito, siguradong hindi lang nostalgia ang ihahain ng Streetboys, handa silang magbigay ng bagong enerhiya at masigabong dance moves.
Kaya mga Ka-Barbie, get ready na dahil siguradong mapapasayaw at mapapa-“pak na pak” ang lahat sa gabing ito!
Abangan na rin ang iba pang bonggang projects ng A-Team para sa 2024 at 2025, kasama na ang concert series ni Ogie Alcasid.