Binaha, nawalan ng kuryente sa Cagayan… Batanes at Babuyan Islands, Signal No. 3 dahil kay ‘Neneng’

ni Lolet Abania | October 16, 2022

Umabot na sa typhoon category ang weather disturbance na ‘Neneng’ matapos na mailagay sa tinatawag na “extreme rapid intensification,” ayon sa PAGASA ngayong Linggo.

Sa kanilang 2PM bulletin, sinabi ng PAGASA, “Neneng underwent extreme rapid intensification and reached typhoon category at 11:00 a.m. today.”

“Further intensification is likely as this tropical cyclone moves over the West Philippine Sea,” dagdag ng state weather bureau.

Ayon sa PAGASA, huling namataan ang bagyo sa layong 145 kilometro kanluran ng Calayan, Cagayan, na may maximum sustained winds na 120 kilometro kada oras malapit sa sentro at gustiness na aabot hanggang 150 kilometro bawat oras.

Itinaas sa Tropical Cyclone Wind Signal No. 3 sa southern portion ng Batanes -- Basco, Mahatao, Uyugan, Ivana, Sabtang; western portion ng Babuyan Islands -- Panuitan Island, Calayan Island, Dalupiri Island.

Signal No. 2 naman sa Batanes; northwestern portion ng Cagayan -- Santa Praxedes, Claveria, Sanchez-Mira, Pamplona, Abulug, Ballesteros; northwestern portion ng Apayao -- Calanasan, Luna, Santa Marcela at Ilocos Norte.

Habang Signal No. 1 sa Kalinga, Abra, northern at central portions ng Ilocos Sur -- Gregorio del Pilar, Magsingal, San Esteban, Banayoyo, Burgos, City of Candon, Santa Lucia, Santiago, San Vicente, Santa Catalina, Lidlidda, Nagbukel, Sinait, San Ildefonso, Galimuyod, City of Vigan, San Emilio, Cabugao, Caoayan, San Juan, Santa, Bantay, Santo Domingo, Santa Maria, Narvacan, Salcedo, Santa Cruz; ang natitirang bahagi ng Apayao, at natitirang bahagi ng Cagayan.

Samantala, binaha at nawalan ng kuryente ang ilang bahagi ng lalawigan ng Cagayan dahil sa malalakas na pag-ulan dulot ng Bagyong Neneng.

“Out of 16 barangays, mayroong totally flooded, at partially flooded. Mayroong lagpas tao ang baha. May ilan na nasa bubong na,” saad ni Michael Villamin, Department of the Interior and Local Government (DILG) officer sa bayan ng Santa Ana sa Cagayan, sa isang radio interview ngayong Linggo.

Sinabi rin ni Villamin, bandang alas-3:30 ng hapon, kahapon nawalan na ng kuryente sa ilang bahagi ng Cagayan.

Ayon pa sa PAGASA, ang Bagyong Neneng ay posibleng lumabas ng Philippine Area of Responsibility (PAR) ng Linggo ng hapon o Linggo ng gabi.