ni Leonida Bonifacio Sison - @Boses | January 21, 2021
Isinailalim na sa anim na buwang preventive suspension ang may 89 barangay chairman dahil sa umano’y katiwalian sa pamamahagi ng Social Amelioration Program (SAP).
Ayon kay Pangulong Rodrigo Duterte, binalaan na niya noon ang mga barangay captain na huwag gagalawin ang pera na ipinamimigay ng gobyerno na pantawid ng mga mahihirap na kababayan sa gitna ng pandemya na dulot ng COVID-19.
Gayunman, sinabi ng Department of the Interior and Local Government (DILG) na kabilang sa mga iregularidad na ginawa ng mga opisyal ng barangay ay ang paghahati ng cash assistance, pamemeke ng master list at pagkuha ng tara o cut mula sa mga benepisaryo.
Matatandaang mahigit P200 bilyon ang halaga ang inilaan para sa SAP sa ilalim ng Bayanihan to Heal As One Act o Bayanihan 1 para mabigyan ng tulong-pinansiyal ang may 18 milyong mahihirap na pamilya sa gitna ng epekto ng COVID-19 pandemic.
Sa totoo lang, dapat lang ‘yan sa inyo. Ang lalakas ng loob n’yong ibulsa ang perang inilaan para sa taumbayan.
Kaya panawagan sa mga kinauukulan, patuloy na turuan ng leksiyon ang mga tiwaling opisyal dahil walang puwang sa gobyerno ang mga ganitong klase ng serbisyo-publiko kuno.
Tipong ginagamit n’yo pa ang inyong posisyon para sa pansarili n’yong kapakanan. Ano’ng klase ng lider ‘yan?!
Sana ay magsilbing babala ito sa lahat ng may posisyon d’yan na nariyan kayo para magsilbi sa publiko at hindi para magpasarap sa puwesto habang kinukulimbat ang kaban ng bayan.
Sa panahon ng pandemya, tunay at may malasakit na lider ang ating kailangan. ‘Ika nga, ‘wag tayo sa mga nagpapanggap na lider dahil hindi nakakatulong.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com
Comments