Bebot na pumatol sa biyudo, ‘di na keri ang ugali ng mga anak

ni Maestro Honorio Ong @Kapalaran ayon sa Palad | November 23, 2023

KATANUNGAN

1. Ang napangasawa ko ay balo o biyudo. Nakapisan ako sa kanila, pero hindi kami magkasundo ng mga anak niya. Gusto ko nang bumukod, pero ayaw niya, hindi na ako masaya sa pagsasama namin.

2. Maestro, magkakahiwalay ba kami? Sa isip-isip ko, kapag hindi ako ibinukod ng bahay ng mister ko sa kanyang mga anak, kahit sabihin pang siya ang nagpapakain sa akin at gumagastos sa mga luho ko ay lalayasan ko na siya. Hindi ko na talaga kaya ang ugali ng mga anak niya na laging kumokontra sa buhay ko at walang mga galang.

3. Sakaling makipaghiwalay ako sa kanya, may ikalawang pag-aasawa pa bang magaganap sa aking buhay? Makakapag-asawa, magkaka-anak at makakaranas pa ba ko ng maligayang pagpapamilya?

KASAGUTAN

1. Sa malapit na hinaharap, tuluyan na kayong maghihiwalay ng landas ng kasalukuyan mong asawa. Ito ang nais sabihin ng nabiyak na unang Marriage Line (Drawing A. at B. 1-M arrow a.) sa kaliwa at kanan mong palad. Tanda na darating ang araw na hindi na mapipigil ang pagsabog ng kinikimkim mong hinanakit sa iyong puso hanggang sa tuluyan mo nang layasan, awayin at iwanan ang mga anak mo sa unang asawa.

2. Makalipas ang ilang panahon pa, masaya pa rin ang mangyayari. Kusa namang matutupad ang ikalawang mas malinaw at makapal na Marriage Line (Drawing A. at B. 2-M arrow b.) sa kaliwa at kanan mong palad. Ito ay nagpapahiwatig na sa ikalawang pakikipagrelasyon, bukod sa magkakaanak ka na (1-C arrow c.), may bonus pa sa ikalawa mong pag-aasawa, tunay ngang habambuhay ka nang magiging maligaya, hatid ng lalaking isinilang sa zodiac sign na Libra.

DAPAT GAWIN

Habang ayon sa iyong mga datos, Trisha, tiyak ang magaganap, hindi matatapos ang taong ito ng 2023, sa buwan ng Disyembre pinakamatagal na sa ikalawang linggo ng nasabing buwan, tuluyan na kayong magkakahiwalay ng iyong asawa upang sa ikalawang pag-aasawa, tulad ng nasabi na, makakasumpong ka na ng isang panatag, maligaya at panghabambuhay na pagpapamilya na nakatakdang mangyari at maganap sa taong 2026 sa edad mong 43 pataas.