ni Atty. Persida Rueda-Acosta @Magtanong Kay Attorney | Mar. 1, 2025
Dear Chief Acosta,
May katanungan ako patungkol sa edad ng pagreretiro sa aking trabaho. Isa akong surface mining employee o “mill plant worker” sa aming kumpanya mula pa noong 2003, at plano kong magretiro ngayong taon. Sa kasalukuyan, ako ay 53 taong gulang na. Tinanong ko ang aming Human Resources Division kung maaari na akong magretiro ngayong taon, ngunit ang sagot nila sa akin ay hindi pa diumano maaari. Sabi nila, kailangan kong maghintay hanggang umabot ako ng 55 taong gulang bago ako makakuha ng retirement pay. Tama ba sila? Maraming salamat sa inyong sagot. — Albert
Dear Albert,
Ang mga manggagawa sa industriya ng pagmimina ay nahaharap sa iba’t ibang mga panganib na minsan ay hindi maiiwasan. Ang mga panganib na ito ay hindi lamang naglalagay sa alanganin ng kanilang pisikal na pangangatawan, kundi nagdudulot din ng malaking banta sa kanilang pangkalahatang kalusugan at kanilang buhay.
Dahil sa matinding panganib ng trabaho sa pagmimina, mahalaga na isaalang-alang ang mga hakbang upang maprotektahan ang mga manggagawa sa industriyang ito. Isang solusyon ng ating bansa ay ang pagbababa sa edad ng pagreretiro para sa mga nagtatrabaho sa minahan. Ito ay isang pagkilala sa mga natatanging hamon na hinaharap ng mga nagmimina sa araw-araw, at pagtitiyak ng kanilang pagreretiro bago pa man magdulot ng malubhang epekto sa kanilang kalusugan ang pinagsama-samang epekto ng kanilang mga kondisyon sa trabaho.
Sa ganitong paraan ng pagbibigay prayoridad sa kalusugan at kapakanan ng mga manggagawa sa pagmimina, maipapakita natin ang pagpapahalaga sa kanilang mga kontribusyon, habang pinapalaganap din ang isang mas ligtas at mas malusog na kondisyon sa trabaho.
Kaugnay nito, noong 1998, isang batas ang ipinasa upang ibaba ang edad ng pagreretiro ng mga manggagawa sa ilalim ng lupa (underground mining) mula sa 60 taon pababa sa 50 taon. Ang batas na ito ay ang Republic Act (R.A.) No. 8558, na nag-amyenda sa Artikulo 287 ng Presidential Decree No. 442 o ang Labor Code of the Philippines.
Gayunpaman, ang batas na ito ay hindi direktang sumaklaw sa mga manggagawa sa surface mining. Dahil dito, noong 2016, inamyendahan naman ang Artikulo 302 ng Labor Code of the Philippines sa pamamagitan ng R.A. No. 10757. Sa batas na ito, isinama ang mga manggagawa sa surface mining sa pagbaba ng edad ng pagreretiro mula 60 taon patungong 50 taon. Ayon sa Seksyon 2 ng R.A. No. 10757:
“SEC. 2. Article 302 of Presidential Decree No. 442, as amended, otherwise known as the ‘Labor Code of the Philippines’, is hereby amended to read as follows:
‘Article 302. Retirement. – Any employee may be retired upon reaching the retirement age established in the collective bargaining agreement or other applicable employment contract.
‘In case of retirement, the employee shall be entitled to receive such retirement benefits as he may have earned under existing laws and any collective bargaining agreement and other agreements: Provided, however, That an employee’s retirement benefits under any collective bargaining and other agreements shall not be less than those provided herein.
‘In the absence of a retirement plan or agreement providing for retirement benefits of employees in the establishment, an employee upon reaching the age of sixty (60) years or more, but not beyond sixty-five (65) years which is hereby declared the compulsory retirement age, who has served at least five (5) years in the said establishment, may retire and shall be entitled to retirement pay equivalent to at least one-half (1/2) month salary for every year of service, a fraction of at least six (6) months-being considered as one (1) whole year.
‘Unless the parties provide for broader inclusions, the term ‘one-half (1/2) month salary shall mean fifteen (15) days plus one-twelfth (1/12) of the 13th month pay and the cash equivalent of not more than five (5) days of service incentive leaves.
‘An underground or surface mining employee upon reaching the age of fifty (50) years or more, but not beyond sixty (60) years which is hereby declared the compulsory retirement age for both underground and surface mine workers, who has served at least five (5) years as underground or surface mine worker may retire and shall be entitled to all the retirement benefits provided for in this Article.
‘For purposes of this Act, surface mine workers shall only include mill plant workers, electrical, mechanical and tailings pond personnel.
‘Retail, service and agricultural establishments or operations employing not more than ten (10) employees or workers are exempted from the coverage of this provision.
‘Violation of this provision is hereby declared unlawful and subject to the penal provisions provided under Article 302 of this Code.
‘Nothing in this Article shall deprive any employee of benefits to which he may be entitled under Section 12-B of Republic Act No. 1161, as amended, otherwise known as the Social Security Act of 1997 and other existing laws or company policies or practices.”
Sa sitwasyong iyong binanggit, maaari ka nang magretiro ngayong taon, kahit na ikaw ay 53 taong gulang pa lamang. Ayon sa ating batas na nabanggit sa itaas, ang isang surface mine worker, na umabot na sa edad na 50 o higit pa, at naglingkod nang hindi bababa sa limang taon bilang manggagawa sa minahan, ay maaari nang magretiro at may karapatan sa lahat ng benepisyo ng pagreretiro.
Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.
Maraming salamat sa iyong patuloy na pagtitiwala.
Comments