Bagong leading man ni Jennylyn sa serye… XIAN, 'DI BINIGYAN NG PRESSCON NG GMA-7 PARA I-WELCOME

ni Nitz Miralles - @Bida | August 18, 2021

Nagkaroon na ng virtual storycon ang teleseryeng Love. Die. Repeat na pagsasamahan nina Jennylyn Mercado at Xian Lim noong Lunes. Naka-post sa Instagram ni Jennylyn at sa IG Stories ni Xian ang naganap na storycon na ididirehe ni Irene Villamor.

Makakasama nina Jennylyn at Xian sina Kim Domingo, Mike Tan, Valerie Concepcion, Shyr Valdez at Gardo Versoza.

Ang nabasa naming synopsis ng serye ay mamamatay ang husband ng karakter ni Jennylyn. Sino kaya kina Gardo at Mike ang gaganap na asawa ng karakter ni Jen? Hindi naman siguro ang karakter ni Xian ang mamamatay. Parang hindi maganda kung ang first project ni Xian sa GMA-7 ay mamamatay ang karakter niya.

Finally, kahit virtually, nagkita na rin sina Xian at Jennylyn dahil nabanggit ng aktor na hindi pa sila nagkikita nang personal. Sa locked-in taping na sila magkikita nang personal ng aktres.

And speaking of Xian, hindi na siya ipina-presscon ng GMA, siguro dahil per project lang ang gagawin niya sa Kapuso Network dahil sa Viva Artist Agency siya may management contract.