ni Erlinda Rapadas @Teka Nga | Jan. 12, 2025
Photo: Rufa Mae Quinto - Instagram
Hindi madali ang pinagdaraanan ngayon ng sexy comedienne na si Rufa Mae Quinto (RMQ). Naghiwalay sila ng kanyang mister na si Trevor Magallanes, na nagsabing wala na siyang balak na balikan pa si RMQ. Nag-file na raw ito ng diborsiyo.
Sumabay pa sa marital problem ni Rufa Mae ang pagsasampa ng kaso ng ilang grupo na nag-aakusa na na-scam sila ni RMQ.
Ganunpaman, pinaninindigan ni Rufa Mae na hindi siya scammer at isa lang siyang endorser. Wala siyang ibinebentang franchise ng anumang beauty products o wellness center. Wala rin siyang balak na takbuhan ang mga kasong isinampa laban sa kanya. Kaya nga umuwi siya agad ng Pilipinas at boluntaryong sumuko sa NBI. Nag-bail siya ng P1.7 million para sa pansamantala niyang paglaya.
Naniniwala si RMQ na mananaig din ang katotohanan at mapapatunayan niyang siya ay inosente.
Sabi nga ni Rufa Mae, “Ako ay nakilalang komedyante. Wala akong anumang negosyo. Product endorser lang ako at hindi negosyante at hindi ako scammer!”
Kaya nga umuwi agad siya ng ‘Pinas at boluntaryong sumuko.
Bago pa man nabunyag sa publiko ang breakup nina Barbie Forteza at Jak Roberto, inamin ni Barbie sa isang interview na nagkulang siya ng oras para sa nobyo dahil sa kaabalahan niya sa kanyang career.
Lalo na noong panahon na nag-click at sumikat ang tandem nila ni David Licauco, ang BarDa, sunud-sunod ang kanilang mga projects at laging magkasama sa mga regional shows.
Ang BarDa rin ang kinukuha sa ilang product endorsements, kaya halos hindi na nagkikita noon sina Barbie at Jak.
Sinikap naman ng aktor na unawain ang sitwasyon nila ni Barbie, lalo na’t may agreement sila na pagdating sa kanilang career ay walang pakialaman. Pursigido si Barbie na i-level-up pa nang husto ang kanyang career. Kaya naman, in a way ay may naging pagkukulang si Barbie kung bakit nauwi sa paghihiwalay ang kanilang relasyon na pitong taon nilang inalagaan.
Lalaki lang si Jak Roberto na nangangailangan ng atensiyon at pagmamahal. Dumarating din ang oras ng kanyang kahinaan.
Well, maraming kaibigan ang labis na nanghihinayang sa nagwakas na magandang love story nina Barbie Forteza at Jak Roberto.
Ngayong 2025, pansamantalang magpapahinga si Jodi Sta. Maria sa kanyang showbiz career. Hindi raw muna siya tatanggap ng serye o pelikula. Nagdesisyon siyang ipagpatuloy ang kanyang pag-aaral at kukuha ng master's degree sa Family and Marriage Therapy.
At this point of her life, na-realize ni Jodi na marami pa siyang puwedeng gawin upang lumawak ang kanyang kaalaman sa buhay. Ang pagpapatuloy sa pag-aaral ang bibigyan niya ngayon ng prayoridad upang maging kapaki-pakinabang para sa kanyang future.
Ganunpaman, hindi naman daw ganap na iiwan ni Jodi ang showbiz. Gusto pa rin niyang makaganap sa mga challenging roles.
Samantala, marami sa mga kaibigan ni Jodi ang humanga sa kanyang desisyon. Naiintindihan nila na mas pinili niya ang ipagpatuloy ang pag-aaral para sa kanyang master’s degree. Ibang fulfillment ang nakukuha ni Jodi Sta. Maria sa pag-aaral.
댓글