ni Ador V. Saluta @Adore Me! | December 27, 2022
Naging special guest sa It's Showtime ang Pop Royalty na si Sarah Geronimo bago nag-Pasko.
Of course, isang malaking sorpresa ang pagbisita ni Sarah sa programa kaya't siya'y napakainit na sinalubong ng mga hosts, especially Vice Ganda, Anne Curtis at iba pa.
Nasa It's Showtime si Sarah para sa promotion ng kanyang bagong single na Dati Dati at sinabayan niya ito ng indak gaya ng dati niyang ginawang dance number sa pinasikat niyang danceable song na Tala.
Sa panayam nina Vice at Anne, hindi sang-ayon ang dalawa sa tanong ni Sarah sa audience kung kilala pa ba nila ang Popstar Royalty. Matatandaang matagal-tagal ding nawala sa sirkulasyon si Sarah pagkatapos niyang namnamin ang pagiging Mrs. Guidicelli.
Tanong ni Sarah, "Kilala pa ba ninyo ako?" na sinalubong ng mga hiyawan sa pambihira nitong pagdating.
Subali't inalmahan ni Vice ang sinabi ni Sarah na baka siya'y nakalimutan na ng mga tao.
Ani Vice, hindi mangyayaring makakalimutan si Sarah ng madlang pipol.
"Ang dami mong napasayang tao .'Yung mga tao, sabik na sabik sila sa 'yo. Mahal na mahal ka namin. Don't ever think na ganu'n ka kadaling makalimutan. Ano ka ba? Makakalimutan namin ang mga password namin, pero hindi namin makakalimutan si Sarah!" aniya.
Tama naman si Vice!
Comments