GIGISING KA, MAGKATALIKOD NA KAYO!
ni Ador V. Saluta - @Adore Me! | August 22, 2021
Naging emosyonal muli si Vice Ganda sa Reina ng Tahanan segment ng programang It's Showtime nitong nakaraang Friday episode (August 20).
Tungkol sa paglisan ng isang mahal sa buhay o "faded love" ang naging usapan nila ng nasabing contestant.
Naitanong ni Vice sa contestant, "Paano mo malalaman kung 'yung araw-araw mong katabi sa kama at araw-araw na kasabay mong kumain ay hindi (pala) totoo ang kanyang yakap at halik?"
Sagot naman ng ReiNanay na si Rebecca, "Alam n'yo po, kahit hindi na i-elaborate, mararamdaman at mararamdaman mo 'yan. Kasi dumarating tayo sa punto na... halimbawa, pagkatapos nating kumain, matutulog na tayo. Meron 'yang ginagawa (gaya ng), ang tagal-tagal niyang pumasok (sa kuwarto)," lahad ng contestant.
Dagdag pa ni Rebecca, "Mararamdaman mong ang kanyang yakap ay kamay na lang, wala na 'yung paa. (Siyempre) Magdududa ka na. Pero 'pag dumating 'yung pagkakataon na wala na 'yung kamay at paa, hala, napakahirap sa damdamin 'yun," aniya pa.
Sagot naman ni Vice, napakasakit sa damdamin na paggising mo, ang katabi mong matulog ay nakatalikod lang pala sa 'yo.
"Ang lungkot nu'n, 'no? 'Pag nakasanayan mo, tapos binabalikan mo."
Hindi man niya binanggit ang pangalan ng nobyong si Ion Perez, ayon sa kanyang salaysay, "Dati, nu'ng magkatabi kami, lahat ng bahagi ng katawan (niya), nakapatong sa 'yo. Tapos, unti-unting nawawala. Tapos, isang araw, gigising ka na lang na magkatalikod na kayo."
Saglit na napawi ang "faded love" topic nu'ng dumako sila ng contestant sa Q and A portion.
Subali't naungkat muli ang topic sa co-host nitong si Kim Chiu at naitanong ni Vice kung nakaranas din ba ang aktres na iwanan ng BF na kanyang ikina-traumatized.
Na si Vice rin naman ang sumagot, "Kapag nasa posisyon ka na masaya, 'pag naisip mo, parang nakakatakot. (At) Ayokong mangyari sa 'kin."
Nagbigay naman ang co-host na si Teddy Corpuz ng advice na napakahalaga ang nasabing diskusyon ni Vice at ng contestant.
Dito na napaiyak si Vice sa sinabi ni Teddy at sey niya, "Ayokong mangyari 'yun," with tears sa mata ng Unkabogable Star at napansin ng madlang pipol na nagpapahid siya ng luha.
May buwelta pa ang It's Showtime main host, "'Pag 'yung love story, ang ganda, parang 'yung pinapanood mo sa pelikula, ang ganda-ganda. Tapos, may biglang eksena na ipinapakita 'yung montage kung gaano sila kasaya nu'ng simula, tapos unti-unting nagbabago, ang lungkot," paliwanag ni Vice.
Hala! May pinagdaraanan kaya ngayon ang relasyong Vice-Ion? Just asking…
Comments