ni Nitz Miralles @Bida | Dec. 19, 2024
Ang marital status ni Atong Ang ang pinag-uusapan sa isang fan site. Married daw si Atong, kaya paanong sila na ni Sunshine Cruz?
Ang businessman daw mismo ang nagsabing married siya, kaya nagugulat ang mga netizens na libre siyang makipagrelasyon kay Sunshine.
May nagtanggol din kay Atong na matagal nang annulled ang kasal nila ng kanyang misis, kaya wala itong sabit.
Tanong pa ng mga netizens na nagtanggol kay Atong at kay Sunshine na rin, may mali raw ba kung nagkagustuhan at nagkainlaban ang dalawa?
May mga bumilib naman na si Atong mismo ang nag-confirm ng relasyon nila ni Sunshine at inaming matagal na niya itong nililigawan bago siya sinagot.
So, tama ang sabi ng mga netizens na 2014 pa nang manligaw si Atong kay Sunshine.
Natawa lang kami sa sagot ng isang netizen sa tanong ng isa pang netizen kung bakit nagustuhan ni Sunshine si Atong, gayung older ito sa kanya? Wala raw bang ibang manliligaw si Sunshine?
Sagot ng maka-Atong, guwapo ang businessman, mabango, maganda ang katawan (walang beer belly), maganda ang tindig at malinis tingnan, kumpara raw sa ibang lalaki na mataba, hindi katangkaran (body shaming na ito) at hindi malinis tingnan.
Baka ang mga katangiang ito ni Atong ang isa sa mga dahilan kung bakit siya nagustuhan at minahal ni Sunshine.
Ipinipilit pa rin ng iba na dahil mayaman si Atong kaya nagustuhan ni Sunshine.
May mga projects si Sunshine, tuluy-tuloy ang kanyang trabaho at wala pa si Atong sa buhay niya, nakabili o nakapagpatayo na siya ng bagong bahay nila ng kanyang mga anak. Paano sasabihing dumedepende siya kay Atong?
Wala si Jillian Ward sa mediacon ng Tolome! Walang Matigas na Pulis sa Matinik na Misis (WMNPSMNM), kaya hindi nito nabanggit ang role niya sa action-comedy series ni Sen. Bong Revilla.
Ayaw namang sabihin ng senador ang role ni Jillian para raw may sorpresa sa mga viewers at aabangan ang premiere nila sa December 22, 7 PM, hanggang sa ending ng Season 3.
Pero, sa trailer ng series, may eksenang binanggit ng karakter ni Jillian ang pangalan ni Reynaldo Bartolome (Bong) sa harap ni Gloria (Beauty Gonzalez) at ito raw ang true love ng kanyang ina.
So, tama ba kami na anak ni Tolome si Dra. Barbara Hidalgo (Jillian)?
Kung mag-ama nga ang karakter nina Bong at Jillian sa series, parang introduction lang ito sa karakter na gagampanan nila sa gagawin nilang pelikula next year na Lagot Ka Sa Tatay Ko.
Anyway, ang Season 3 ng TWMNPSMNM ang pinakamaikling season dahil seven weeks lang tatakbo, pero ito rin ang season na may pinakamaraming guests. May Gloria Diaz, Sid Lucero, Jay Manalo, Ryan Eigenmann, Jon Lucas, Faith da Silva, Leo Martinez at marami pang iba.
Bukod sa promo ng GMA-7, may sariling promo para sa show ang Imus Productions at ito ay ang Tolome’s Christmas Dance Challenge na ang announcement ng winners ay sa Dec. 22, 5 PM, bago ang airing ng show ni Bong. May Tolome’s Amazing Na Pasko Giveaway din si Bong at pinaaabangan nito ang announcement.
Umabot sa six pages ang sagot ni Rita Daniela sa isinumiteng counter affidavit ni Archie Alemania.
Sa report ng GMA News, nakasaad sa reply affidavit ni Rita na ipinagdiinan ng kampo niya na ang isinumiteng counter affidavit ni Archie ay mas nagpatotoo sa reklamo ng aktres laban sa aktor.
Wala si Archie sa panunumpa ni Rita sa sagot niya sa counter affidavit, isang representative lang ni Archie ang dumating para kumuha ng reply affidavit ni Rita na nangyari noong December 17 sa Bacoor Hall of Justice sa Bacoor City.
Sa January 7, 2025, si Archie naman ang dadalo sa preliminary investigation na ginagawa sa act of lasciviousness case na isinampa ni Rita laban sa kanya. Haharap siya sa prosecutor ng Bacoor City.
Kapag natapos daw ang preliminary investigation at nai-submit na for resolution, maipa-file na ang complaint ni Rita sa Korte. Aakyat na ang kaso sa korte at dito na malalaman kung makakasuhan na si Archie, kaya kaabang-abang ang mangyayari sa January 7, 2025.
Comments