ni Erlinda Rapadas - @Teka Nga! | August 25, 2021
Mismong ang manager ni Paolo Contis na si Manay Lolit Solis ang nagsabi at nagpatotoo na hiwalay na nga ang aktor at si LJ Reyes.
Pero, itinanggi ni Manay Lolit ang balitang may third party involved. Wala raw kinalaman ang leading lady ni Paolo na si Yen Santos sa pelikulang A Faraway Land sa breakup nila ni LJ.
Ang tunay daw na dahilan ng paghihiwalay ay nanlamig na sila sa isa't isa. Na-outgrow na raw nina LJ at Paolo ang romansa sa kanilang pagmamahalan. In short…nagkasawaan na sila!
Pero, ganu'n na lang ba kadali para kay Paolo na hiwalayan si LJ lalo na't may anak sila? Hindi ba't napaka-unfair naman nito para kay LJ na nagawang mag-lie-low sa kanyang career dahil binigyan niya ng prayoridad ang relasyon nila ni Paolo Contis?
Natatandaan naming nanalo pang Best Actress noon si LJ Reyes sa kanyang pagganap sa pelikulang Anino sa Likod ng Buwan. Medyo may pagka-daring at seductive ang role roon ni LJ kaya siya napansin ng ilang award-giving bodies.
Ngunit nang ma-in love kay Paolo ay naudlot ang pagsikat ni LJ bilang aktres. Pinagbawalan na siya ni Paolo na tumanggap ng daring roles at sinunod naman ni LJ dahil mahal na mahal niya ang aktor.
Hindi na rin siya gaanong naging aktibo sa kanyang career hanggang sa siya ay nagbuntis at isinilang niya si Summer.
Tapos ngayon, basta na lang sasabihin na “na-outgrow” nila ang kanilang feelings sa isa't isa?
Marami sa mga kaibigan ni LJ ang nagpayo na mahalin naman niya ang kanyang sarili at 'wag magpakamartir sa pag-ibig. Lagi na lang siyang nasasaktan at nadedehado sa larangan ng pag-ibig. Dalawa na ang kanyang anak kaya dapat maging matatag na siya at matutong manindigan at ipaglaban ang kanyang karapatan.
Quota na si LJ sa mga heartaches. Buhayin na lang niya ang dalawa niyang anak. Harapin at balikan niya ang kanyang career upang maka-survive kahit isa siyang single mom.
May plano rin si LJ na mag-migrate na sa USA at iwan na ang 'Pinas.
Comments