Action series, last episode na… BONG, MAMIMIGAY ULI NG MGA LAPTOP, CELLPHONES AT CASH

ni Nitz Miralles @Bida | August 17, 2023

Nakakatuwa naman si Sen. Bong Revilla, Jr. dahil sa last episode ng Walang Matigas na Pulis sa Matinik na Misis, higanteng sorpresa, big prizes at dobleng saya ang handog niya sa mga viewers na sumubaybay sa Season 1 ng action series.

Tinawag na “Pasasalamat ni Tolome Giveaway” ang handog ni Bong at kabilang sa kanyang mga ipamimigay ay laptops, mobile phones, cash prizes at iba pang papremyo na ikatutuwa ng mga sumubaybay sa kanyang show.

Nangako rin si Bong na isang matinding bakbakan at matitinding mga action scenes na susuungin ni Tolome ang mapapanood sa season finale ng show.

Magsisimula ang pa-giveaway ni Bong nang 5:30 PM hanggang sa start ng show nang 7:15 PM.

Isasabay sa pasasalamat ni Bong ang gender reveal ng baby ni Cong. Jolo Revilla at ng misis nitong si Angel Revilla sa Facebook. Pahuhulaan nina Jolo at Angel ang gender ng baby nila at big prizes ang mapapanalunan ng makakahula.