Accredited laboratories para sa COVID-19 testing sa ‘Pinas, 89 na

ni Thea Janica Teh - | July 20, 2020

Mayroon ng kabuuang 89 laboratories sa buong Pilipinas na lisensyadong magsagawa ng independent testing para sa COVID-19. Ito ay matapos makakuha ng accreditation ang apat pa mula sa Department of Health (DOH).

Sa daily report ng DOH, sinabing mayroon ng 67 accredited polymerase chain reaction (PCR) facility at 22 GeneXpert laboratory ang Pilipinas.

Ang bagong accredited ng DOH ay ang Philippine Children’s Medical Center, Mary Mediatrix Medical Center, Philippine Red Cross Cebu Charter at University of Cebu Medical Center.

Sa ngayon ay mayroon pang 180 laboratories ang sumasailalim sa five-step accreditation process. 160 rito o 89% nito ay nasa stage 3 pataas na.

As of July 18, nakapag-test na ng 1,058,764 katao ang mga lisensyadong laboratory at 89,387 dito ay nagpositibo sa test. Ito ay may rate na 8.4%.

Samantala, kayang i-test ng bawat accredited laboratory sa bansa ang halos 22,579 sample sa isang araw. 17,501 dito ang nagpositibo sa COVID-19 at may weekly positivity rate na 11.7%.