ni Nancy Binay @Be Nice Tayo | May 19, 2024
Nitong nakaraang linggo ay naging bahagi tayo ng hearing ng Senate Committee on Public Services para imbestigahan ang mga isyu na kailangang tugunan sa ating mga airport.
Paulit-ulit na kasi ang reklamo na marumi, mainit o kaya naman ay sira ang mga pasilidad sa ating mga paliparan.
Matatandaang nasira ang cooling tower ng NAIA Terminal 3 kamakailan kaya dusa ang mga pasahero sa init ng temperatura sa terminal.
Tumirik din ang ilang mga escalator kaya naman sunud-sunod ang naging pasakit sa mga pasahero.
☻☻☻
Nagtataka ang inyong lingkod pati na rin ang ibang mga kapwa ko senador kung bakit hinayaan ng mga namumuno sa Manila International Airport Authority (MIAA) na humantong sa ganito ang kalagayan ng ating mga airport.
Giit naman ng MIAA, kakailanganin nila ng anim na buwan para maayos ito dahil inoorder pa abroad ang spare parts.
Pangako nila ay sa Hunyo magiging maayos na ang escalator sa nasabing airport.
☻☻☻
Bukod dito, tinalakay din natin ang estado ng mga airport sa probinsya.
Kinamusta natin kung bakit hindi pa sinisimulan ang pag-aayos sa Iloilo International Airport at ang problema sa rami ng tao sa Laguindingan Airport.
Umaasa tayo na sa tulong ng hearing na ito ay aaksyunan na ng DOTr at MIAA ang hinaing ng ating mga pasahero lalo na at paulit-ulit na ang mga aberya na nararanasan nila.
☻☻☻
Patuloy pa rin tayong mag-ingat sa paglabas ng bahay, magsuot ng face mask ‘pag kinakailangan, ugaliing maghugas ng kamay, bigyang-halaga ang kalusugan, at huwag kalilimutang magdasal. Be Safe. Be Well. Be Nice!
Kung mayroon kayong nais idulog o ipaabot sa inyong abang lingkod, maaari kayong sumulat sa BE NICE TAYO ni Sen. Nancy Binay, BULGAR Bldg., 538 Quezon Ave., Quezon City o mag-email sa benicetayo.gmail.com.
Paalala lamang na sana ay isama ninyo sa inyong mga liham ang inyong contact number upang mas madali namin kayong mapaglingkuran. Always Be Nice! FOLLOW US! Facebook: www.facebook.com/SenatorNancyBinay Twitter: www.twitter.com/SenatorBinay @SenatorBinay Instagram: @SenatorNancyBinay
Comments