ni Jeff Tumbado @News | September 30, 2023
Nasawi ang isang 63-anyos na lalaki na ang sinasabing dahilan ay ang pag-atake sa kanya ng alaga nitong aso sa Talisay City, Cebu.
Duguan at wala nang buhay nang matagpuan sa loob ng banyo ang biktimang si George Mayol, residente ng Bgy. Mohon.
Nabatid sa ulat ng Talisay City Police Office, ilang kaanak na ng biktima ang humingi ng tulong sa pulisya dahil hindi na nila nakikita ang biktima simula pa noong Setyembre 25.
Hanggang sa nitong Setyembre 27, nang suriin ng mga awtoridad ang bahay ay nakita ang katawan ng biktima sa loob ng banyo.
Ayon sa report ng medico legal ng Talisay City police, nagtamo ng mga sugat ang biktima sa iba't ibang parte ng katawan at sa mukha.
Isa sa limang alagang aso ng biktima ang pinaniniwalaang umatake sa kanya.
Base na rin sa salaysay ng kapatid ng biktima, inatake na rin noong nakaraang taon ng alagang aso si Mayol at nagtamo ito ng maraming sugat.
Pero sa kabila ng payo na i-surrender sa city pound ang aso dahil sa pagiging agresibo, tumutol si Mayol dahil sa pagmamahal sa alaga.
Dahil sa nangyari, dinala na sa city pound ang mga alagang aso ng biktima, batay na rin sa utos ng Talisay Veterinary Office.
Comments