ni Julie Bonifacio @Winner | Mat. 2, 2025
Photo: IG - Meryll Soriano at Joem Bascon
Tuloy na tuloy pa rin ang pagtakbo ni Willie Revillame bilang senador this coming election at busy na siya sa pangangampanya.
May tsikang solo flight lang si Willie sa ginagawa niyang kampanya at wala ni isa mang member sa kanyang pamilya ang kasama ng TV host/senatoriable sa panunuyo sa mga botante.
Napag-alaman namin ito mula mismo kay Joem Bascon na partner ng panganay na anak ni Willie na si Meryll Soriano.
Nakausap namin si Joem sa special screening ng bagong obra-maestra ni Cannes Best Director Brillante Mendoza, ang Bansa (Motherland), na ginanap sa The Secret Garden events place sa Busilak St., Mandaluyong City last Sunday.
Hindi raw sila sinabihan ni Willie na sumama at tumulong sa pangangampanya niya. Pero kapag nagsabi naman daw si Willie sa kanila, by all means, tutulong sila ni Meryll.
Pag-amin ni Joem sa amin, “When it comes to that, ‘yung tulong namin siyempre… hindi naman patago. Pero tutulong kami the best way na pupuwede kami, kung mabibigyan ng tsansa, ‘di ba?
“Pero for now, siyempre focused kami on working, focused kami sa baby namin. At si Sir Wil naman, focused siya sa campaign niya. Pero siyempre, ‘pag… alam mo naman ‘yun, ‘pag ipinatawag… siyempre, ang dami nang tulong na naibigay sa ‘min, so, pupunta kami.”
Tinanong namin si Joem kung bakit “Sir” ang tawag niya sa ama ni Meryll.
Tugon ng aktor, “Nahihiya kasi akong tawaging Papa o ano, eh. Puwede naming tawaging Senator, Sen.. ‘Hi, Sen.’”
As of last time na kausap namin si Joem, wala siyang alam kung ano ang napag-usapan nina Willie at Meryll pagdating sa suportang hihingin ng TV host sa pangangampanya.
“I guess with Meme (pet name ni Meryll), hindi ko kasi maano kung ano ang napag-usapan nilang dalawa. Pero naka-focus si Meme with work.
“Pero ‘yung buong puso, kaluluwa, buong pagkatao n’ya is ‘yung suporta n’ya, nand’yan for her dad,” paliwanag ni Joem.
Limang taon nang nagsasama sina Joem at Meryll. Sa loob ng panahong ito ay nabiyayaan sila ng anak na lalaki, ang four-year-old na si Gido.
Natawa si Joem nu’ng matanong namin kung bakit ‘di pa sila nagpapakasal ni Meryll.
“Tingnan natin. Hahaha! Hindi ko masagot, eh. Nahihiya ako siyempre. Darating ‘yung panahon na tatanungin ko na s’ya, ganu’n. Pero ‘di pa sa ngayon.
“Siyempre, marami pa s’yang… mas madami pa s’yang kailangang gawin para sa sambayanan. So, hindi ko pa muna maisingit.
“Doon muna s’ya naka-focus. Kailangan s’ya ng sambayanang Pilipino,” diin ni Joem.
Ang mahalaga sa ngayon, maayos at masaya ang pagsasama nila ni Meryll with Gido at ang magandang relasyon nila ni Willie.
Pagbabahagi pa ni Joem, “They’re very relaxed, pero s’yempre, ‘yung pagod with the campaign. It will take a toll, and we’re just here to support him.
“We’re just here to make it easier for him to see ‘yung mga grandson niya para at least, maibsan ‘yung pagod.
“Pero s’yempre, ‘pag nakikita n’ya ‘yung mga taong nagtsi-cheer sa kanya, I’m sure nakakawala ng pagod ‘yun. But for now, ‘yun po muna ang kaya naming mai-offer.”
Bukod kay Joem, nanood din sa special screening ng Bansa ang iba pang gumanap sa papel bilang PNP-SAF 44 sa pangunguna nina Rocco Nacino, Mon Confiado, Richard Quan, Kiko Matos, Mac Mendoza, at Jess Mendoza.
Naipalabas ang Bansa sa Busan International Film Festival sa Japan kamakailan. At pagkatapos ng Japan, for sure, iikot pa sa iba’t ibang international film festival ang Bansa (Motherland).
Comments