ni Lolet Abania | April 21, 2022
Umakyat na sa 224 ang naiulat na nasawi dahil sa Bagyong Agaton ngayong Huwebes, ayon sa National Disaster Risk Reduction and Management Council (NDRRMC).
Base sa 8AM report ng NDRRMC, ang lahat ng bagong naiulat na namatay ay mula sa Eastern Visayas na may kabuuang 202.
Gayundin, nasa 17 indibidwal naman mula sa kabuuang nai-report na nasawi ay mula sa Western Visayas, tatlo sa Davao, at dalawa sa Central Visayas.
Ayon sa NDRRMC, ang bilang ng mga indibidwal na naiulat na nawawala ay umakyat na rin sa 147 mula sa 111, habang ang bilang ng mga nasaktan dahil sa bagyo ay nananatiling walo.
Subalit, ang mga nai-report na 18 namatay, pitong nawawala, at anim na nasaktan ang nakumpirma pa lamang sa ngayon.
Nasa kabuuang 2,081,011 katao o 599,956 pamilya ang labis na naapektuhan ng Bagyong Agaton mula sa 2,421 barangay sa Bicol, Western Visayas, Central Visayas, Eastern Visayas, Northern Mindanao, Davao, Soccsksargen, Caraga, at Bangsamoro.
Sa naturang bilang, 109,518 indibidwal o 29,911 pamilya ang nananatili sa 447 evacuation centers. Sinabi naman ng NDRRMC, umabot na sa halagang P64,028,560 assistance ang naibigay sa mga apektadong lugar.
Comments