Bigyang-daan natin ang ilang bagay na puwedeng isabuhay ngayong may COVID-19.
Hindi lang ang madalas na paghuhugas ng mga kamay ang inirerekomendang gawin dahil ang pagkain ng mga prutas ay maganda ring isabuhay ngayon at kahit tapos na ang lockdown. Pero hindi madali ang magtanim ng prutas dahil maraming taon ang kailangan para ito ay mapakinabangan. Dahil dito, ang pinakamadaling gawin ay ang magtanim ng gulay at prutas na magpapalakas ng ating immune system.
Oo, madali lang magtanim ng gulay kaya puwedeng gawin agad at tiyak na ilang araw lang ay agad na itong pakikinabangan.
Hindi naman lingid sa kaalaman ng lahat na kapag itinanim ang talbos ng kamote, ito ay tutubo agad dahil puwede itong itusok sa paso at plastic bottles. Diligan ito paminsan-minsan, pero mas maganda kung araw-araw itong didiligan.
Bakit ka bibili ka pa ng talbos kung tiyak naman na sa loob ng isang linggo ay puwede nang talbusan ang sarili mong tanim? Sa palengke, more or less ay limang piraso lang ang tangkay ng talbos na nasa isang tali na iyong nabili. Kaya para mas maganda, limang piraso rin na tangkay ang itanim mo para marami ang aanihin mo. Pero sa susunod na linggo, higit sa 5 tangkay ang makukuha mo dahil maglalabasan ang mga sangay at makakaroon din ito ng mga talbos.
Kaya sa susunod na pagpitas mo at ang nakonsumo lang ay limang piraso, puwede mo na ring bigyan ang iyong mga kapitbahay dahil paparami nang paparami ang bilang ng aanihin mong mga talbos. Sa huli, nakagugulat dahil puwede mo na ring ibenta ang inaani mong talbos ng kamote.
Ganito rin ang alugbati na kakumpitensiya na ng talbos ng kamote dahil marami nang gumagamit nito sa pagluluto at tulad din ng talbos, ito rin ay puwedeng ulamin.
Pero may isang talbos na pinakasikat sa lahat at ito ay ang kangkong. Noon, walang English sa kangkong, pero ngayon, ito ay tinatawag na watercress at madalas ay tinatawag din na water spinach.
Sa kasalukuyang nakikita natin sa mga ilog at body of fresh water, napakarami at napakalawak na taniman ng kangkong. Kaya inaakala ng iba na sa tubig lang ito nabubuhay at mali ang ganu’ng paniwala dahil maging sa lupa, bakuran, paso at iba pang containers ay puwedeng tumubo ang kangkong.
Ang totoo nga, ang unang kangkong sa ‘Pinas ay tumutubo sa bukid, kaya noon pa man ay isinasama ng mga sinaunang Pinoy na pansahog ang kangkong sa iba’t ibang lutuin, pero ang pinakasikat noon ay ang nilagang kangkong kung saan pakukuluan lang ito at puwede ng iulam at minsan, isasawsaw sa asin, patis o toyo. Ganyan ang buhay sa probinsiya dahil napakaraming kangkong sa paligid.
Sa makabagong panahon, mula sa China, dinala nila ang pagtatanim ng kangkong sa pamamagitan ng pag-aalaga sa body of fresh water o ilog na ang tubig ay matabang o hindi maalat.
Malambot kainin ang makabagong kangkong at ito rin ay malutong kapag inaani. Ang Tagalog na kangkong na hanggang sa ngayon ay may makikita pa rin naman sa mga probinsiya ay makunat at medyo matigas kahit na naluto na.
Itutuloy