Nilinaw ng Department of Health (DOH) na hindi sinibak sa pwesto bilang direktor ng Research Institute of Tropical Medicine (RITM) si Dr. Celia Carlos.
Sa isang statement na inilabas ng DOH, nakasaad na nananatili pa rin si Carlos bilang direktor ng RITM.
Nakasaad pa rito na ang RITM ay inilagay sa superbisyon ni DOH Assistant Secretary Nestor Santiago, ng Public Health Services Team, para matutukan ni Carlos ang iba pang trabaho sa RITM.
Layon din umano nitong magamit ni Carlos ang kanyang technical expertise habang si Asec. Santiago naman ang mangunguna sa management ng expansion ng testing capacity ng RITM sa mga public at private laboratories.
Humingi naman ng paumanhin ang DOH sa pagkalito na idinulot ng nasabing maling balita.
Una nang kumalat ang balita ng pagsibak umano kay Carlos dahil sa pagtanggi nitong i-prioritize ang pagproseso ng covid test ng ilang pulitiko at vip na asymptomatic naman.