Nitz Miralles / Bida
Ginulat ni Barbie Forteza ang mga followers niya sa Instagram (IG) nang mag-post siya ng ultrasound result kung saan makikitang may baby. Kung hindi babasahin ang caption ni Barbie na: “Congratulations! Ramdam ko kung ga’no kasaya ang kapatid ko ngayon @amithatbad @benvierneza, so alam mo na, dear? Automatic Potterhead ka ha? Wala kang choice. I can’t wait to see you!!! I’m a certified Tita of Manila! NAKAKALOKA!!!,” iisiping siya ang preggy.
In fact, marami ang nag-react na akala nila, si Barbie ang buntis. Si Maricris Garcia nga, nag-comment na akala niya ay naunahan na siya ng magaling na aktres. Sobra ang tawa ni Barbie sa comment ni Maricris.
Sa nabasa naming comment, ngayon pa lang, kinukuha nang ninong ng sister ni Barbie ang BF ng aktres na si Jak Roberto. Siguradong kukunin ding ninang si Barbie ng kapatid niya para sa kanyang pamangkin kaya magiging magkumpare at magkumare na sila ni Jak bukod sa pagiging magdyowa.
Samantala, natutuwa ang mga viewers ng Anak ni Waray vs. Anak ni Biday dahil ipinakita ni Barbie ang versatility niya. Mapa-drama at comedy scene, nagagawa niya nang mahusay. Naaawa rin sa kanya ang mga viewers kapag inaapi siya ni Dina Bonnevie.