BINUWELTAHAN ng kampo ni Manila Mayor Francisco “Isko Moreno” Domagoso si dating City Administrator Jojo Alcovendaz kaugnay sa pag-turnover ng mga dokumento mula sa panahon ni dating Mayor Joseph ‘Erap’ Estrada.
Umalma si Secretary to the Mayor Bernie Ang makaraan umanong ipangalandakan ni Alcovendaz na tinanggihan umano niya ang pag-turnover ng naturang mga dokumento.
Unang inihayag ni Alcovendaz na hindi umano tinanggap sa opisina ni Ang ang mga itini-turnover nilang dokumento kaya dinala nila ito sa Department of Interior and Local Government (DILG).
Ipinaliwanag ni Ang na napagkasunduan ng transition team nina Domagoso at Estrada na pormal na iti-turnover ang lahat ng dokumento noong Hunyo 28, alas-10:30 ng umaga sa VIP lounge ng Quirino Grandstand, sa harap ng mga kinatawan ng Commission on Audit at DILG.
Gayunman, inisnab ng transition team ni Estrada ang turnover.
Ayon kay Ang, base sa pahayag ng isang babaeng staff sa kanyang tanggapan, isang babae umano ang dumating at sinabing ipinadala siya ni Alcovendaz, alas-5:30 ng hapon noong Hunyo 28.
Pinare-receive umano ng babae ang dokumento pero, tinanggihan ito dahil tapos na ang office hours at hindi siya awtorisado na tumanggap ng dokumento at dapat na itinurnover ang dokumento sa transition team ni Domagoso.