TATLONG police officials ang pinangalanan na ni Philippine National Police (PNP) Chief Director General Oscar Albayalde na posibleng hahalili sa kanya sa posisyon bilang bagong pinuno ng Pambansang Pulisya.
Ayon kay Albayalde, maaaring ipalit nito sa kanyang puwesto ang mga pangalan na nasa listahan din ng dating PNP chief at ngayon ay si Senator-elect Ronald ‘Bato’ dela Rosa.
Sina National Capital Region Police Office (NCRPO) Chief Maj. Gen. Guillermo Eleazar, Deputy Director Gen. Archie Francisco Gamboa, PNP operations chief at ang directorial staff chief na si Lt. Gen. Camilo Pancratius Cascolan, ang tanging tatlong pinangalanan na police officials na nasa next in line ni Albayalde.
Ayon kay Albayalde, ang tatlo ay pawang may magagandang performances at sina Gamboa at Cascolan ay kapwa senior at next in line.
Gayunman, si Gen. Eleazar na bagaman, hindi senior at mula sa Class 87 ay mayroon ding hindi matatawarang performances noong kapanahunan nito bilang Quezon City Police Director, Police Regional Office 4 Director at kasalukuyan sa NCRPO.
Nakatakdang magretiro sa puwesto bilang PNP chief si Gen. Albayalde sa Nobyembre 2019.
