ANG pagbubuhat ng barbell ay ginagawa bilang ehersisyo dahil nakapagpapalakas at nakapagpapatibay ito ng muscles. Pero, knows ba ninyo na ang pagbubuhat ng barbell ay nakababawas ng tsansa sa pagkakaroon ng heart attack at stroke?
Wow, amazing!
Ayon sa pag-aaral na isinagawa sa Iowa State University, ang pagbubuhat ng barbell ng isang oras kada linggo ay nakababawas ng tsansa sa pagkakaroon ng stroke at heart attack ng 70 porsiyento.
Ang pag-aaral ay isinagawa sa 13,000 katao sa pamamagitan ng pag-aanalisa sa kanilang resistance exercise at cardiovascular disease na nararanasan sa kasalukuyan.
Ayon kay Dr. Duck-chul Lee, associate professor ng Kinesiology, hindi kailangang maglaan ng maraming oras sa weightlifting o regular na pagpunta sa gym upang makuha ang nasabing mga benepisyo.
Bukod pa rito, hindi lamang barbell ang maaari ninyong buhatin kundi maging ang mabibigat na shopping bags at dumb-bells din.
Sa katunayan, mas marami umanong benepisyo ang naibibigay ng pagbubuhat kung ikukumpara ito sa regular na pagtakbo.
Napag-alaman ng mga researcher na nakatutulong din ito sa metabolismo upang hindi maipon ang excess fats na maaaring magdulot ng high blood pressure na sanhi ng stroke at diabetes.
Gayundin, ang karagdagang aerobic activity ay walang naidagdag na benepisyo sa pagbubuhat ng barbell.
Nakatutulong din umano ang pagbubuhat upang maiwasan ang obesity at mayroon din itong long-term benefits sa kalusugan.
Lumabas din sa resulta ng pag-aaral na ang paglalaan ng isang oras sa loob ng isang linggo para magbuhat ng barbell ay nakapagpapababa ng 29 na porsiyento ng tsansa na maka-develop ng metabolic syndrome at nakabababa ng 32 porsiyento ng high cholesterol.
Oh, ayan mga bro at sis, hindi lang pala pampalaki at pampatibay ng muscles ang pagbubuhat. Kaya naman alam n‘yo na ang gagawin ninyo upang makaiwas sa stroke at heart attack.
Palaging tandaan, stay healthy! Okie?