3 pulis, guilty sa pagpatay kay Kian

HINATULAN ng guilty sa kasong murder ang tatlong pulis dahil sa pagka­kasangkot sa pagpatay sa menor-de-edad na si Kian Lloyd delos Santos sa Ca­loocan City kasabay ng ma­lawakang kampanya ng gob­yerno laban sa iligal na droga.

Sa naging desisyon ni Judge Rodolfo Azucena ng Regional Trial Court (RTC) Branch 125 ng Caloocan, ang mga akusadong sina PO3 Arnel Oares, PO1 Jeremias Pereda at PO1 Jerwin Cruz ay napatunayang nagkasala sa kasong murder at sila ay nasentensiyahan ng reclu­sion perpetua “with­out eligibility of parole” at iniutos na ba­yaran ang pamilya ni Delos Santos ng P100,000 in civil indemnity, P100,000 in mo­ral damages, P45,000 in actual damages at P100,000 in exemplary damages.

Absuwelto naman ang tatlong pulis sa kasong pag­tatanim ng ebidensiya kay Delos Santos, 17-anyos pa lamang nang maganap ang krimen.

Sa record ng pulisya, alas-8:45 ng gabi nang ma­ganap ang insidente noong August 16 noong nakalipas na taon, ilang metro lamang ang layo sa bahay ni Delos San­tos sa Block 7, Riverside Ba­esa, Bgy. 160, Caloocan City kung saan ay nagsagawa ng drug operation ang mga ta­uhan ng PCP-7 kabilang ang tatlong akusado.

Hindi naman pinaboran ng korte ang paliwanag ng tatlong pulis na ipinagtang­gol lamang nila ang kanilang sarili nang manlaban si Delos Santos habang isinasagawa ang drug operation.

Matatandaang, inakusa­han ng pulisya si Delos San­tos na isa sa mga nagpapa­kalat ng droga sa kanilang lu­gar, ngunit, mariin namang itinanggi ng pamilya nito ang akusasyon at sinasabi pang masipag na estudyante ang kanilang anak.

Bukod kay Kian, dalawa pa ang sumunod na napatay ng mga awtoridad sa pinaig­ting na operasyon laban sa iligal na droga at ito ay sina Carl Angelo Arnaiz, 19, at Reynaldo de Guzman alyas “Kulot”.