ISANG 37-anyos na tricycle driver na inakusahang nang-rape sa tatlong taong gulang na babae ang nasawi matapos mabaril ng pulis na kanyang inagawan ng baril sa loob mismo ng presinto sa Cabanatuan City.
Dalawang tama ng bala ng baril sa katawan ang tinamo ng suspek na si Ariel Vicquerra.
Ayon kay Cabanatuan City Police Chief Supt. Ponciano Zafra, bigla na lamang umanong inagaw ni Vicquerra ang service firearm ni PO1 Edward Azurin alas-4:40 ng hapon habang isinasailalim sa booking procedure sa loob mismo ng warrant section.
Dito nakakuha umano ng pagkakataon ang suspek nang tanggalan ito ng posas ni Azurin at doon nagkaroon ng komosyon na humantong sa pagkakapaslang sa suspek.
Naisugod pa ang suspek sa Paulino J. Garcia Memorial Research and Medical Center subalit, idineklara itong dead-on-arrival.
Una rito, dinakip ng pulisya si Vicquerra sa Sta. Ana, Pampanga nitong Huwebes dahil siya ang huling nakitang kasama ng biktima noong Nobyembre 13 at halinhinang ginahasa sa bahay nito.