AYON sa United Nations Population Fund (UNPF), mayroong 9.7 milyong kababaihan na may edad 10 hanggang 19 kung saan pagtungtong ng 19 taong gulang, isa sa lima sa kanila ay nagiging ina.
Nangyayari ang maagang pagbubuntis hindi lamang dahil pinili nila ito kundi dahil sa kawalan ng edukasyon, impormasyon at pangangalaga ng kalusugan.
Dahil dito ay naging laganap sa iba’t ibang lipunan ang adolescent pregnancy.
Ang sex education ay pag-aaral tungkol sa sekswalidad ng tao kabilang ang kalusugan, relasyon, pakiramdam, responsibilidad, bahagi ng katawan, sexual reproduction, sexual activity, age of consent, reproductive rights, birth control at pagpipigil sa pagtatalik.
Ang edukasyon tungkol dito ay nagsisimula sa kani-kanyang tahanan at ipinagpapatuloy sa paaralan para sa mga batang mag-aaral na karaniwang nalalantad sa maseselan at sensitibong karanasan o impormasyon tungkol sa pagtatalik.
Ayon sa mga doktor, unang-unang dapat tingnan ng mga magulang ay kung handa na ba ang mga anak bago talakayin ang sex education.
Sila ang unang nakaaalam kung kaya na nila itong maintindihan o kung sila ay may kakayahan nang makipag-usap tungkol dito.
Dapat na ihanda ng mga magulang ang sarili upang matiyak na tama ang kanilang kaalamang ibabahagi sa mga bata.
Suhestiyon para sa mga magulang ay dagdagan ang kaalaman at abilidad na magturo nang maayos sa pamamagitan ng pagbabasa.
Maaari ring magtanong sa ibang mga magulang at propesyunal kung hindi sigurado sa gagawin.
Panatilihin din ang bukas na komunikasyon sa mga anak para maging mas komportable silang magtanong at pag-usapan ang anumang paksa.
Pakinggan, sagutin, gabayan at payuhan sila nang wasto at may responsibilidad sa lahat ng bibitiwang salita.
Hangad natin na ang mga estudyante na nasa hustong gulang ay maging maalam sa tama at mali, kumilos nang naaayon at kung paano tumugon sa posibleng pang-aabuso ng mga mapagsamantala.
Gayunman, sa eskuwelahan ituturo sa mga estudyante ang pagkakaiba ng “good touch” sa “bad touch” upang maiwasang maging biktima ng pang-aabuso.
Sa pag-alalay ng mga guro, gagabayan sila sa kaalaman tungkol sa “age appropriate developmental and culture sensitive” sexuality education.
Sa kabila ng iba’t ibang pananaw ng tao sa pagtuturo ng sex education sa mga paaralan, minabuti ng Department of Education (DepEd) na ipatupad ang “Policy Guidelines on the Implementation of the Comprehensive Sexuality Education” na naglalayon na magkaroon ng pang-unawa, kaalaman, mensahe at pamamaraan ng pagtuturo ng sex education sa lahat ng private at public elementary school, junior/senior high school, state universities at colleges at local universities at colleges.
Bukod sa maagang pagbubuntis, isa rin sa mahahalagang gampanin ng mga guro ay maiiwas ang mga mag-aaral sa sakit tulad ng AIDS (Acquired Immune Deficiency Syndrome) na dala ng HIV (Human Immunodeficiency Virus) na nakukuha sa pakikipagtalik sa taong mayroong impeksiyon nito.
Higit sa lahat, mainam na kabilang sa kurikulum ng mga kabataan ang kasanayan sa buhay, ugali, kasarian at empowerment na kanilang tinatalakay sa subjects tulad ng Good Manners and Right Conduct, Health and Science, Social Studies at Home Economics.
Upang maiwasan ang anumang problema o kapahamakan, lalo na sa mga kabataan dahil sa kakulangan at kawalan ng kaalaman tungkol sa sex education, dapat tayong magkaisa sa pagturo at paggabay sa kanila upang maihatid sila sa tamang landas para na rin sa katuparan ng kanilang mga pangarap.