ni Lolet Abania | July 7, 2021
Isinailalim sa lockdown ang isang istasyon ng pulisya matapos na magpositibo ang 13 police officers sa COVID-19 sa Arevalo, Iloilo City.
Ang Iloilo City Police Station 6 ng nasabing lalawigan ay ini-lockdown simula kahapon, Martes, upang magbigay-daan sa disinfection sa gusali nito. Hindi naman binanggit ng mga awtoridad kung gaano katagal ipatutupad ang lockdown ng istasyon.
Ayon kay Iloilo City Police Office (ICPO) Director Police Col. Uldarico Garbanzos, unang sumailalim sa swab test ang mga pulis na nakasalamuha ng kabarong nasawi dahil sa cardiac arrest na positibo rin sa COVID-19 nitong Hunyo 25. Apat sa mga pulis ang nagpositibo sa COVID-19 matapos lumabas ang resulta ng kanilang RT-PCR test.
Agad namang isinailalim sa swab test ang naging close contacts ng apat at sa naging resulta nitong Hulyo 6, siyam pang mga pulis ang nagpositibo rin sa COVID-19.
Gayunman, agad na ipinasara ng ICPO ang gusali ng Iloilo City Police Station 6 kahapon. Dinala na sa isang quarantine facility ng lugar ang 12 pulis na pawang mga asymptomatic habang nasa ospital ang isang pulis matapos makitaan ng sintomas ng sakit.
Isinailalim naman sa strict quarantine ang iba pang miyembro ng pulisya ng naturang istasyon, kabilang na rito ang kanilang hepe. Dinagdagan din ng mga operatiba ang ICPO para sa patuloy na operasyon kahit naka-lockdown ang naturang istasyon ng pulisya.
Comments