ni Mary Gutierrez Almirañez | April 22, 2021
Nanawagan ang human rights at environmental group sa pamahalaan hinggil sa lumalaganap na climate crisis at COVID-19 pandemic, kasabay ng paggunita sa Earth Day 2021 sa ginanap na Pandesal forum kaninang umaga, Abril 22, sa Kamuning Bakery sa pangunguna nina Deputy Speaker Loren Legarda at Greenpeace Southeast Asia Executive Director Yeb Saño.
Ayon kay Saño, “The pandemic has shown us how much crises are making already challenging situations even worse for our communities already suffering food insecurity, dwindling livelihoods, and other impacts of the climate emergency. “
Dagdag pa niya, “An immediate and strong resolution from the CHR on the climate and human rights petition would provide a strong rallying point to protect humanity from further climate-destructive activities by entities that put profit over people and the planet. This will be the Filipino people’s legacy to the rest of the world.”
Paglilinaw naman ni Legarda, hindi na makababalik sa normal ang ‘Pinas, bagkus ay dapat pa iyon mahigitan upang maging ‘best normal’ sa pagtatapos ng pandemya.
Aniya, “No. We have to go back to the best normal. Mindful, consumption… This is a better normal.”
Ibinida rin ni Legarda ang mga likas na yaman sa bansa at iginiit niyang kulang lamang sa maayos na pag-i-implement ang pamahalaan upang magamit at mapangalagaan ang mga iyon. Nanawagan din siya para sa sapat na pondo at suporta mula sa gobyerno.
Batay pa sa datos ng Greenpeace, tinatayang 129 bilyong disposable face masks ang nakokolekta sa buong mundo kada buwan, kaya inirekomenda nila ang paggamit ng reusable face masks at personal protective equipment (PPE) upang mabawasan ang mga basurang nagko-contribute ng polusyon sa mundo.
Samantala, matatandaan ding nag-abiso ang Japan hinggil sa pagpapakawala nila ng mga tubig sa Fukushima nuclear plant na nagdulot ng agam-agam sa mga kritiko. Gayunman, nilinaw ni Legarda na ang gagawin ng Japan ay may basehan at nakatitiyak siyang pinag-aralan iyong mabuti ng mga eksperto.
Sa ngayon ay nakikiisa ang ‘Pinas sa pagdiriwang ng Earth Day 2021 at umaasa ang bansa sa pagkakaisa ng mga mamamayan upang mapangalagaan ang kalikasan.
Comments