Zambales nakamit na ang herd immunity vs. COVID-19

ni Jasmin Joy Evangelista | March 16, 2022

Nakamit na ng probinsiya ng Zambales ang herd immunity kontra COVID-19 matapos mabakunahan ang 70% ng target eligible population nito, ayon sa isang opisyal noong Lunes.

Ayon kay Dr. Noel Bueno, provincial health officer, ito ay dahil sa mataas na bilang ng mga nagpapabakuna sa mga vaccination sites.

Nasa 454,730 residente ang bumuo sa 70 percent ng 649,615-population ng probinsiya.

Sinabi rin ni Bueno na nasa 71 percent ng kanilang target ang nabakunahan na ng 1st dose kontra COVID-19.

Samantala, ayon sa independent analytics group OCTA Research, “very low risk” for COVID-19 na ang probinsiya dahil sa pagbaba ng bilang ng kaso ng Covid sa lalawigan.

Party-themed COVID-19 vaccination site, sumalubong sa mga bata sa Zambales

ni Jasmin Joy Evangelista | February 16, 2022

Nasa 100 batang edad 5-11 ang nagpabakuna sa children’s party vaccination site sa Iba, Zambales nitong Martes (Feb. 15).

Iba’t ibang comic book characters at lobo ang sumalubong sa mga bata rito.

Mayroon ding party clowns na nagpe-perform habang ginagawa ang free face paints, at party giveaways habang naghihintay ang mga bata na mabakunahan kontra-COVID-19.

Hinikayat naman ni Dr. Maria Francial Laxamana, assistant health secretary, ang mga magulang na pabakunahan ang kanilang mga anak.

Mahalaga aniya na mabakunahan ang mga bata lalo na para sa mga batang magbabalik sa in-person classes.

Sinabi rin ni Laxamana na makatutulong ang pag-abot sa herd immunity upang mapabilis ang pagbangon ng ekonomiya.

Samantala, nauna nang sinabi ni Dr. Noel Bueno, provincial health director, na papayagan sa bakunahan sa probinsiya ang ‘walk-ins’ para mas maraming mahikayat na mga magulang na dalhin ang kanilang anak sa mga vaccination sites.

Bayan sa Zambales magsasagawa ng COVID-19 vaccination sa bahay ng mga bedridden, senior citizens

ni Jasmin Joy Evangelista | February 9, 2022

Magsasagawa ng COVID-19 vaccination sa mga bahay ang Castillejos, Zambales LGU ngayong Miyerkules, Feb. 9, para sa mga bedridden at senior citizens.

Sa inilabas na advisory nitong Martes, sinabi ng lokal na pamahalaan na puwedeng i-register ng kaanak ang mga indibidwal na kabilang sa nasabing kategorya sa mga barangay health stations o ipagbigay-alam sa vaccination team sa pamamagitan ng pagtawag sa kanilang hotline.

Patuloy naman ang mass vaccination sa general population ng naturang bayan kung saan puwede ang mga walk-in sa first dose at booster shots.