'Pinas at US, sanib-puwersa sa WPS

FPni Angela Fernando - Trainee @News | November 21, 2023

Nagsimula na ang joint maritime at air patrols ng 'Pinas at U.S. sa West Philippine Sea ngayong Martes.

Ayon kay Pangulong Bongbong Marcos sa kanyang post sa X, mahalagang hakbang ang pagkilos na ito dahil patunay ito ng pangakong pagpapalakas ng makabagong puwersang militar sa pangunguna ng maritime at air patrols.

Aniya, malaki ang tiwala niyang magbibigay ng ligtas at matibay na bansa para sa mamamayan ang ginawang kolaborasyon.

Bahagi ang pagkilos na ito ng kasunduan ng Mutual Defense Board - Security Engagement Board (MDB-SEB) ng dalawang bansa.

Nilinaw naman ng Presidente na magpapatuloy ang pagpapatrol hanggang Nobyembre 23.

Mangingisdang hinabol ng CCG, nakakuha ng bagong bangka

ni Angela Fernando - Trainee @News | November 18, 2023

Binigyan ng bagong motorized boat ng Rotary Club ng Calapan ngayong Sabado ang mangingisdang hinabol ng Chinese Coast Guard nu’ng buwan ng Setyembre dahil ayaw pangisdain sa Scarborough Shoal.

Kinilalang si Arnel Satam ang mangingisda na ngayon ay labis ang pasasalamat dahil malaking bagay ang bangkang natanggap niya para sa kanyang hanapbuhay.

Ayon kay Calapan Rotary Club Pres. Percival Martinez, maaaring gamitin ni Satam ang bangka para pagkakitaan ito dahil hindi lang siya ang makikinabang dito kundi maging ang mga Pinoy na umaasa rin sa mga mangingisda.

Aniya, kung titigil si Arnel at ang ibang kagaya niya na mangisda dahil sa sigalot sa China sa West Philippine Sea ay magkakaroon din tayo ng kakulangan sa suplay ng makakaing isda.

Matatandaang humingi ng tulong si Satam sa Philippine Coast Guard dahil napagtanto niya ang kakulangan ng suporta ng mga ito sa lugar.

Nagpaalala rin ang mangingisdang hindi dapat na matakot na ipaglaban ang sariling teritoryo ng bansa.

Marcos at Xi, maghaharap para sa WPS

ni Angela Fernando - Trainee @News | November 17, 2023

Kinumpirma ngayong araw ni Pangulong Ferdinand "Bongbong" Marcos Jr. ang magiging paghaharap nila ng presidente ng China na si Xi Jinping sa isang pagpupulong upang talakayin ang tumataas na tensyon ukol sa West Philippine Sea.

Ibinahagi ni Marcos ang kanilang naging pag-uusap ni Vice President Kamala Harris tungkol sa WPS kung saan natalakay ang mga paraan para panatilihin ang kapayapaan sa gitna ng China at 'Pinas.

Aniya, ang nakikita niyang kolektibong misyon ng bansa, Philippine Coast Guard, militar, ng mga mangingisda, at ng lahat ay mapanatili ang kapayapaan at mapababa ang umiinit na mga insidente sa WPS.

Matatandaang patuloy ang agresyon ng China laban sa mga kilos ng PCG at mga mangingisda sa sariling teritoryo ng 'Pinas.