Barko ng China sa WPS, nabawasan na

ni Angela Fernando - Trainee @News | December 6, 2023

Malaki ang ibinababa ng bilang ng mga barkong pandagat ng China sa Julian Felipe Reef, ayon sa pahayag ng militar ngayong Miyerkules.

Ito ay matapos ihayag ng isang mataas na mambabatas na magpadala ng mas maraming barko ng Philippine Navy upang pigilan ang presensya ng nasabing bansa sa West Philippine Sea.

Saad ni Philippine Navy Vice Admiral Alberto Carlos ng Western Command, ang bilang ng mga sasakyang pandagat ng China na nasa lugar ay malaki ang ibinaba mula sa 135 na dami nito kamakailan.

Dagdag niya, kasalukuyan pang tinitingnan ang lokasyon ng mga sasakyang pandagat.

Aniya, kasama sa standard operating procedure ng 'Pinas pagdating sa mga vessel ng China ang paglabas ng mga radio challenge at pagsusuri sa presensya ng mga ito.

Ayon pa kay Carlos, laging nandoon ang Philippine Navy at ang Philippine Coast Guard sa tuwing nakikita nila ang pagtaas sa presensya ng mga sasakyang pandagat ng dayuhang bansa sa teritoryo ng WPS.

Sa kabilang banda, nagpahayag si House Deputy Minority Leader France Castro ng pagkadismaya dahil sa pagpasok ng China sa bahagi ng bansa sa kabila ng ipinapakitang pagtutol at mga diplomatikong protesta ng mga Pinoy at sinabing hindi gumagana ang existing procedures na sinasabi ng Philippine Navy.

Christmas convoy ng Atin Ito! Coalition, pinayagan sa WPS

Fni Angela Fernando - Trainee @News | November 28, 2023

Inaprubahan ng National Security Council (NSC) ang Christmas convoy ng 'Atin ito!' Coalition na maglalayag sa West Philippine Sea o Ayungin Shoal.

Pahayag ng tagapagsalita ng NSC na si Asst. Director Jonathan Malaya, ang Christmas convoy ay pupunta rin sa Pagasa Island upang mamigay ng mga aginaldo sa mga sundalong bantay sa BRP Sierra Madre.

Aniya, ibibigay sa Philippine Navy-AFP at sa Philippine Coast Guard ang mga regalo at mga suplay upang masabay ito sa resupply mission sa Ayungin Shoal.

Tiniyak ng NSC ang kaligtasan ng mga sasama sa nasabing convoy sa WPS.

Saad pa ni Malaya, iikot ang convoy sa mga teritoryo ng 'Pinas at magbibigay ito ng kumpiyansa sa mga sundalo at frontliners ng bansa na magpatuloy sa pagpapalakas ng depensa.

'Pinas at US, sanib-puwersa sa WPS

FPni Angela Fernando - Trainee @News | November 21, 2023

Nagsimula na ang joint maritime at air patrols ng 'Pinas at U.S. sa West Philippine Sea ngayong Martes.

Ayon kay Pangulong Bongbong Marcos sa kanyang post sa X, mahalagang hakbang ang pagkilos na ito dahil patunay ito ng pangakong pagpapalakas ng makabagong puwersang militar sa pangunguna ng maritime at air patrols.

Aniya, malaki ang tiwala niyang magbibigay ng ligtas at matibay na bansa para sa mamamayan ang ginawang kolaborasyon.

Bahagi ang pagkilos na ito ng kasunduan ng Mutual Defense Board - Security Engagement Board (MDB-SEB) ng dalawang bansa.

Nilinaw naman ng Presidente na magpapatuloy ang pagpapatrol hanggang Nobyembre 23.