UK, kinondena ang mga kilos ng China sa WPS

ni Angela Fernando - Trainee @News | December 12, 2023

Kinondena ng Britain nu’ng Lunes ang mga mapanganib na kilos ng China sa mga barko ng 'Pinas sa West Philippine Sea kamakailan.

Ayon sa foreign office, "The UK opposes any action which raises tensions, including harassment, unsafe conduct and intimidation tactics which increase the risk of miscalculation and threaten regional peace and stability." 

Binigyang-diin din sa pahayag na ang dalawang bansa ay dapat sumunod sa Arbitral Award proceedings, na may legal na bisa para sa parehong China at 'Pinas.

Mariin namang tinutulan ng Beijing ang sinabi ng UK at tinawag itong "groundless accusations,"  ayon  sa isang tagapagsalita ng  Chinese Embassy sa London.

Ayon sa pahayag ng Beijing na naka-post sa website ng embassy, "We urge the British side to respect China's territorial sovereignty and maritime rights and interests in the South China Sea, stop stirring up trouble and sowing discord."

Christmas convoy boat, matagumpay na nakarating sa Lawak Island

ni Angela Fernando - Trainee @News | December 11, 2023

Matagumpay na narating ng isang bangkang parte ng 'Christmas convoy' ang Lawak Island nitong Lunes kahit pa bantay-sarado ang West Philippine Sea (WPS) ng mga barkong militar ng China.

Kinumpirma ito ng 'ATIN ITO'  Coalition sa isang pahayag, “December, 5:00 am. Nakalusot! They are now in the process of dropping off donations and supplies with the help of frontliners stationed in the area." 

Matatandaang inurong ng ATIN ITO ang kanilang misyon matapos na sila'y paikutan ng mga sasakyang pandagat ng China nu'ng Linggo. 

Kasunod din ito ng mga ulat na ang mga barkong militar ng China ay binangga at ginamitan ng water cannon ang mga sasakyang pandagat ng 'Pinas na nasa misyon at patungo sa BRP Sierra Madre sa Ayungin Shoal.

Pagkondena sa China sa WPS, inihirit sa Kongreso

ni Angela Fernando - Trainee @News | December 6, 2023

Nagkaisa ang House of Representatives nitong Miyerkules na aprubahan ang resolusyong nagpapahayag ng pagkondena sa 'di makatarungang pagsalakay ng China sa West Philippine Sea.

Naglalayon ang House Resolution 1494 na udyukan ang pamahalaan na palagan at ipaglaban ang karapatan ng 'Pinas sa exclusive economic zone (EEZ) ng bansa na kinikilala ng Hague-based Permanent Court of Arbitration (PCA).

Nakasaad sa resolusyon na dapat bigyang-diin ng bansa ang karapatan sa WPS at ipatupad at panindigan ang ipinanalong teritoryo sa Permanent Court of Arbitration (PCA) sa Hague, Netherlands.

Matatandaang idineklara ng PCA nu'ng taong 2016 na ang Panganiban (Mischief) Reef, Ayungin (Second Thomas) Shoal, at Recto (Reed) Bank ay nasa loob ng EEZ ng Pilipinas at ibinasura ang hinaing ng China hinggil sa South China Sea.

Idiniin naman sa resolusyon na ang mga mapanganib na kilos ng China laban sa mga misyon ng bansa at para sa regular rotation and resupply (RORE) sa BRP Sierra Madre ay mas lumalala dahil sa mga sunud-sunod na insidente.