G7 leaders, tutol sa agresyon ng China sa WPS

ni Angela Fernando @World News | June 16, 2024

Nagpahayag ng pagtutol ang mga lider ng Group of Seven (G7) sa mga ginagawang aksyon ng China sa kanilang tinatawag na South China Sea (SCS) o ang West Philippine Sea (WPS), partikular sa agresyon ng nasabing bansa laban sa mga sasakyang pandagat ng 'Pinas.

Iginiit ng mga lider ng G7 kamakailan, na binubuo ng Canada, France, Germany, Italy, Japan, United Kingdom, at United States, ang kanilang hinaing sa unilateral na pagtatangkang baguhin ang status quo sa SCS sa pamamagitan ng puwersa o pamimilit.

Binigyang-diin din ng G7 na walang legal na batayan ang pang-aangkin ng China sa teritoryo ng 'Pinas at tinututulan nila ang militarisasyon, at mga pananakot ng bansa sa SCS.

Mangingisda at sundalo mas mag-ingat sa WPS — Sen. Tolentino.. 'Wag magpaaresto!

by Info @News | June 14, 2024

Pinag-iingat ni Senador Francis 'Tol' Tolentino ang mga mangingisda at mga sundalong nagbabantay sa teritoryo ng Pilipinas laban sa posibleng dagdag na panggigipit ng China sa West Philippine Sea (WPS).

Simula Hunyo 15, ipatutupad ng China ang bagong batas na nagbibigay permiso sa kanilang Coast Guard na manghuli at ikulong ng isang buwan ang sinumang tatapak sa itinuturing nilang teritoryo.

Kaugnay nito, ipinayo umano ng senador sa mga mangingisda at sundalo na huwag magpaaresto. “Ipagdasal natin ang ating mga sundalo at mangingisda laban sa walang tigil na paninikil ng China.

Sa Zambales at sa Palawan, at hindi lang 'yung sa BRP Sierra Madre,” diin ni Senador Tol. Dagdag pa ng mambabatas, dapat nang patibayin ang naval defense ng bansa para humarap sa mga ganitong panggigipit.

Hirit ni SP Escudero, isyu sa WPS, dalhin sa ASEAN

ni Angela Fernando @News | June 5, 2024

Iminungkahi ni Senate President Francis "Chiz" Escudero nitong Miyerkules na itaas ang isyu sa West Philippine Sea (WPS) sa Association of Southeast Asian Nations (ASEAN) sa gitna ng pinakabagong agresyon ng China laban sa mga Pilipinong military.

Sinabi ito ng bagong luklok na pinuno ng Senado nang tanungin kung dapat bang magsampa ng panibagong kaso ang 'Pinas laban sa China.

"Option palagi ‘yan ng ating pamahalaan pero isang concern din na nais kong i-bring up ay sana subukan, kung kakayanin ng ating DFA, na dalhin ito sa ASEAN.

‘Yan ang regional organization na kinabibilangan ng Pilipinas at hindi maikakaila ang isyung ito kaugnay sa West Philippine Sea ay nagaganap sa loob na nasasakupan ng ASEAN," saad ni Escudero.

Dagdag pa ni Escudero, hindi man kilala ang ASEAN bilang politikal na asosasyon, magagamit pa rin ang forum para mapag-usapan ang nagaganap sa WPS.

Tugon ito sa video na inilabas ng Armed Forces of the Philippines (AFP) na nagpapakita ng mga tauhan ng China na kinukuha ang mga supply na nakalaan para sa mga sundalong Pilipino na nakatalaga sa BRP Sierra Madre sa Ayungin Shoal, sinabi ni Escudero na tila pinapalala nito ang tensyon sa lugar.

Ngunit nanawagan ang mambabatas sa lahat ng partido na manatiling kalmado sa kabila ng mga kamakailang kilos ng mga tauhan ng China, binigyang-diin na walang nagnanais ng digmaan sa rehiyon.