Paghabol at pananakot ng barko ng China sa ABS-CBN media sa WPS, iimbestigahan

ni Ronalyn Seminiano Reonico | April 10, 2021

Iimbestigahan na ng Department of Foreign Affairs (DFA) ang diumano'y panghahabol at pananakot ng barko ng China sa Filipino vessel na lulan ang mangingisda at ABS-CBN media sa West Philippine Sea (WPS) kamakailan.

Ayon sa DFA, kapag nakumpirma na ang insidente, makikipag-ugnayan sila sa China ukol dito.

Pahayag pa ng DFA, "Philippine authorities are looking into reports of Chinese vessels chasing after a television crew aboard a Philippine vessel in the West Philippine Sea. If proven to be true, the Department of Foreign Affairs will raise the matter with the Chinese government.

"In the meantime, the Department is thankful that the crew and the Filipino vessel are safe.”

Nagpaalala rin ang DFA na makipag-ugnayan muna ang publiko sa awtoridad ng Pilipinas bago bumisita sa Kalayaan Island sa WPS.

Sa ulat ng mamamahayag ng ABS-CBN na si Chiara Zambrano, mayroong 2 Chinese missile crafts na diumano'y sumunod sa kanila sa paglalayag nila papuntang Ayungin Shoal sa WPS na malapit sa Palawan.

Pahayag pa ni Zambrano, “Tiningnan namin ang location namin sa GPS, kami ay nasa 90 nautical miles lamang mula sa pinakamalapit na kalupaan ng Palawan.”

Aniya pa, “Pumunta kami rito para itanong sa mga mangingisdang Pilipino kung ano ang ikinatatakot nila sa paglalayag sa West Philippine Sea at hindi namin inaasahan na mismong kami ay mararanasan at makikita namin ‘yung ganitong powerful na mga vessel o sasakyang pandagat ng China.”

ABS-CBN media, hinabol at tinakot ng barko ng China sa WPS

ni Mary Gutierrez Almirañez | April 9, 2021

Hinabol ng Chinese Navy ang Filipino vessel na sinakyan ng media papuntang Ayungin Shoal para sana makapanayam ang mga Pinoy na naapektuhan ang pangingisda dahil sa daan-daang barko ng China na nakakalat sa West Philippine Sea.

Batay sa pahayag ng ABS-CBN Reporter na si Chiara Zambrano ngayong umaga, “Isa du'n sa mga bakurang pupuntahan sana natin ay ‘yung Ayungin Shoal dahil alam naman natin na mayroong detachment ang Armed Forces of the Philippines doon kaya naisip namin, baka puwedeng pumunta roon ang mga mangingisdang Pinoy dahil magiging kampante sila dahil may nakabantay sa kanilang taga-AFP.”

Isinalaysay ni Zambrano na kaagad silang nilapitan at hinarangan ng Chinese Navy kaya nagpasya silang bumalik na lamang sa Palawan, subalit hindi pa rin sila tinantanan ng Chinese Coast Guard 5101 na aktong may dalawang missile boat na sumunod sa kanila sa loob nang mahigit kalahating oras.

“Tiningnan namin ang location namin sa GPS, kami ay nasa 90 nautical miles lamang mula sa pinakamalapit na kalupaan ng Palawan. Malinaw na malinaw na nasa loob kami ng exclusive economic zone kung saan dapat, malaya na nakakapangisda, nakakapaglayag ang lahat ng Pilipino, at lahat ng yamang-dagat dito ay para sa Pilipinas. Tayo dapat ang nakikinabang.”

Paliwanag pa niya, “Pumunta kami dito para itanong sa mga mangingisdang Pilipino kung ano ang ikinatatakot nila sa paglalayag sa West Philippine Sea at hindi namin inaasahan na mismong kami ay mararanasan at makikita namin ‘yung ganitong powerful na mga vessel o sasakyang pandagat ng China.”

Samantala, nagpahayag naman ng suporta si US Secretary of State Antony Blinken sa ‘Pinas hinggil sa kontrobersiyal na West Philippine Sea at South China Sea. Iginiit din niyang makikipagkita siya kay Department of Foreign Affairs (DFA) Secretary Teodoro Locsin, Jr. upang pag-usapan ang tungkol doon at iba pang isyu.

Batay sa kanyang tweet, “Substantive conversation today with my Philippine counterpart, @teddyboylocsin, discussing our concerns with People’s Republic of China militia vessels in the South China Sea and our efforts to combat anti-Asian hate and violence.”

Kaugnay ito sa naging pahayag ni US State Department Spokesperson Ned Price na susuportahan ng Amerika ang Pilipinas laban sa China.

"We will always stand by our allies and stand up for the rules-based international order," sabi pa ni Price.

China, binuweltahan ang US sa isyu sa WPS

ni Ronalyn Seminiano Reonico | March 23, 2021

Bumuwelta ang Chinese Embassy, Manila sa United States kaugnay ng pagsuporta nito sa Pilipinas sa West Philippine Sea matapos mamataan ang diumano’y 220 maritime militia vessels ng China sa Julian Felipe Reef noong March 7.

Sa official Twitter account ng Chinese Embassy Manila, mababasa ang tweet ng isang news site na: “US Embassy on Chinese ships at Juan Felipe Reef (Whitsun): Chinese boats have been mooring in this area for many months in ever increasing numbers, regardless of the weather.

We stand with the Philippines, our oldest treaty ally in Asia.”

Pahayag naman ng Chinese Embassy, “The United States is not a party to the South China Sea issue. Fanning flames and provoking confrontation in the region will only serve the selfish interests of individual country and undermine the regional peace and stability.”

Saad pa ng embahada, "Both China and the Philippines are sovereign and independent countries. We have the will, wisdom and ability to properly handle relevant issues through bilateral channels.” Una nang pinabulaanan ng China na "maritime militia" ang mga naturang vessels at nanatili lamang daw ang mga barko sa reef dahil sa “rough sea condition.” Samantala, umaasa ang Malacañang na madadaan sa usapan ang isyu ng bansa sa China.