21 barko ng China, naispatan papunta sa direksyon ng Pag-asa Island

ni Madel Moratillo @News | August 14, 2023

May 21 Chinese maritime militia vessels ang namataan ng isang U.S. maritime security expert na patungo sa direksyon ng Pag-asa Island sa West Philippine Sea.

Sa isang post sa kanyang Twitter account, sinabi ni dating U.S. Air Force official at ex-Defense Attaché Ray Powell na ang 21 Chinese vessels na ito ay pinaniniwalaang kabilang sa mga nauna nang nakita sa Ayungin Shoal.

Posibleng kabilang din ito sa insidente noong Agosto 5 kung saan binomba ng tubig at nagsagawa ng delikadong maneuver ng barko ng Chinese Coast Guard sa barko ng Philippine Coast Guard at mga bangka na may dalang supply para sa BRP Sierra Madre.

Ang mga nasabing barko ng China ay patungo aniya sa hilagang bahagi ng Pag-asa Island.

Bukod dito, may 19 Chinese militia ships ang nananatili rin umano sa Ayungin Shoal.

Ang 3 barko ng Chinese Coast Guard na kasama sa pagharang sa barko ng Pilipinas ay nakabalik na aniya sa Hainan Island, habang ang 3 iba pa ay walang katiyakan.

Matapos ang August 5 incident, muling nagpadala ng note verbale ang Pilipinas sa China.

BRP Sierra Madre sa Ayungin Shoal, 'di isusuko

ni Mylene Alfonso @News | August 14, 2023

Mahigpit ang pagtutol ni Senador Bong Go sa anumang potensiyal na kasunduan na alisin ang BRP Sierra Madre mula sa Ayungin Shoal.

Inihayag ito ng mambabatas sa isang panayam noong Biyernes matapos ang monitoring visit sa Malasakit Center sa Catbalogan City, Samar.

Sinegundahan pa ni Sen. Go ang paglilinaw ni Pangulong Ferdinand Marcos, Jr. na walang anumang kasunduan hinggil sa isyu, at kung mayroon man ay binabawi o kinakansela na niya ito.

"Unang-una, hindi po ako aware kung meron man agreement o wala na dapat nang i-withdraw ang BRP Sierra Madre sa Ayungin Shoal," pahayag pa ni Go, nang matanong hinggil sa naturang pahayag ni P-BBM, kaugnay ng umano'y kasunduan sa pagitan ng pamahalaan at ng China upang alisin ang BRP Sierra Madre mula sa Ayungin Shoal.

"Kung ano po ang atin ay atin. What is ours is ours po. At bilang Pangulo, si Pangulong Bongbong Marcos bilang chief architect ng ating foreign policy, ay alam niya po kung ano po ang mas makakabuti sa atin considering all things,” dagdag pa ng senador.

“Katulad ng sinabi ko noon not a single square inch ang isu-surrender natin d’yan. What is ours, is ours po,” giit pa ng mambabatas.

Matatandaang kamakailan ay binomba ng tubig ng Chinese Coast Guard ang Filipino vessels sa West Philippine Sea.

Anang China, pumayag umano ang Pilipinas na i-withdraw ang BRP Sierra Madre ngunit hindi tinukoy kung sinong lider ng gobyerno o ahensiya ang nangako nito sa kanila.

Kapwa naman itinanggi ng Malacañang at ng Department of Foreign Affairs (DFA) ang pahayag ng China.

Barkong nakaangkla sa WPS kapag inalis.. 'Pinas, papalag na sa China — AFP

ni Mai Ancheta @News | August 13, 2023

Ilalaban ng Armed Forces of the Philippines (AFP) ang BRP Sierra Madre sakaling puwersahang alisin ito ng China sa Ayungin Shoal.

Ito ang mariing inihayag ni AFP Spokesman Colonel Medel Aguilar sa isang forum sa harap ng mainit na isyu sa BRP Sierra Madre na nakaangkla sa Ayungin Shoal na bahagi ng teritoryo ng Pilipinas.

Ayon kay Aguilar, bagama't ang scenario ay "speculative" o haka-haka, hindi hahayaan ng militar na galawin ang kinakalawang na barko ng Pilipinas sa Ayungin Shoal.

Nagsalita na aniya si Pangulong Ferdinand Marcos, Jr. na hindi aabandonahin ang Ayungin Shoal, kaya ito ang ipatutupad ng militar.

Matatandaang nagsalita ang Presidente na walang ano mang kasunduan sa China para alisin ang barko ng Pilipinas sa pinag-aagawang teritoryo kaya mananatili ang BRP Sierra Madre sa isla.

Tiniyak din ng AFP Spokesman na magpapatuloy ang resupply mission sa kanilang tropa na nakadestino sa Ayungin Shoal kaya dapat na kumilos nang naaayon ang China Coast Guard sa halip na gumawa ng mga aksyon na labag sa international law at magdulot ng panganib sa buhay ng mga tao.

Sinabi ni Aguilar na lalatay sa China Coast Guard ang kanilang ano mang magiging aksiyon at sila ang sisisihin sakaling magkaroon ng disgrasya sa karagatan.

Matatandaang umani ng batikos at pagkondena mula sa iba't ibang bansa ang paggamit ng water cannon ng China Coast Guard sa barko ng Philippine Coast Guard (PCG) matapos harangin ang resupply mission sa BRP Sierra Madre noong nakalipas na linggo.