Anak ni US-Pres. Donald Trump, positibo sa COVID-19

ni Thea Janica Teh | November 21, 2020

Nagpositibo sa COVID-19 si Donald Trump, Jr., anak ni US President Donald Trump at wala umano itong nararamdaman na kahit anong sintomas, ayon sa spokesman nito.

Nakumpirmang positibo sa virus si Trump nitong Lunes at agad na sinimulan ang quarantine noong makuha ang resulta.

"He's been completely asymptomatic so far and is following all medically recommended COVID-19 guidelines," dagdag pa ng spokesman.

Samantala, nakumpirma nitong Biyernes na positibo rin sa COVID-19 si Andrew Giuliani, anak ng personal lawyer ni Trump na si Rudy Giuliani.

57.17 M kaso ng COVID-19, naitala sa buong mundo

ni Thea Janica Teh | November 21, 2020

Tinatayang nasa 57.17 milyon na ang bilang ng kaso ng COVID-19 sa buong mundo nitong Biyernes at 1,365,111 dito ang namatay na, ayon sa tally ng Reuters.

Ang mga naimpeksiyon ay mula sa 210 bansa kabilang ang China kung saan unang nagkaroon ng kaso noong Disyembre, 2019.

Nangunguna ang US sa may pinakamataas na bilang na 11,737,129 kaso at 252,493 ang namatay. Sinundan naman ito ng India sa 9,004,365 kaso at 132,162 ang namatay; Brazil sa 5,981,767 kaso at 168,061 ang namatay; France sa 2,086,288 kaso at 47,127 ang namatay at Russia sa 2,039,926 kaso at 35,311 ang namatay.

Samantala, nakapagtala naman ang Pilipinas nitong Biyernes ng kabuuang 415,067 bilang ng kaso ng COVID-19 at 8,025 dito ang namatay.

Iskul pinagbabaril, 19 patay, 22 sugatan

ni Lolet Abania | November 2, 2020

Tinatayang 19 ang namatay at 22 ang nasugatan nang pagbabarilin at pasabugin ng mga militante ang Kabul University, ang pinakamalaking unibersidad sa Afghanistan ilang oras matapos na sila’y makipaglaban sa security forces, ayon sa opisyal ng nasabing bansa.

"Three attackers were involved. One of them blew up his explosives at the beginning, two were brought down by the security forces," pahayag ni Interior Ministry Spokesman Tariq Arian.

Paliwanag ng grupong Taliban, wala silang kinalaman sa naganap na insidente ngayong Lunes sa Kabul University. Subali’t maraming eskuwelahan na ang inatake ng extremist groups tulad ng Islamic State (IS) sa nakalipas na taon.

Ayon kay Kabul Police spokesman Ferdaws Faramerz, karamihan sa mga nasawi ay mga estudyante. Gayundin, ayon kay Hamid Obaidi, isang tagapagsalita ng Ministry of Higher Education, nagsimula ang pag-atake ng mga militante nang dumating ang mga opisyal ng gobyerno para sa pagbubukas ng Iranian book fair na inorganisa ng nasabing eskuwelahan.

Unang pinagbabaril ng mga gunmen ang pasilidad ng unibersidad kung saan daan-daang mga estudyante ang nagtakbuhan at nag-unahan sa paglabas ng campus, ayon sa isang nakasaksi. Mayroong 800 estudyante ang nasa Social Sciences Faculty nang oras na iyon.

"The attack is over, but sadly 19 people have been killed and 22 more wounded," ayon sa post ni Arian sa Twitter. Patuloy na nagsasagawa ng imbestigasyon ang Afghan security forces at sinusuyod ang nasabing lugar.

Naglagay din ng kordon sa mga daan papunta sa unibersidad para maiwasang lumala ang insidente. Inaalam pa ng awtoridad kung anong grupo ang umatake sa Kabul University.