Pagwawakas ng work-from-home arrangement, nakadepende sa mga employer — DOLE

ni Jasmin Joy Evangelista | November 6, 2021

Ipinauubaya na ng Department of Labor and Employment (DOLE) sa mga employer kung ipagpapatuloy ang work-from-home arrangement ng kanilang mga empleyado sa kabila ng COVID-19 pandemic.

Ito ay ipinahayag ni Labor Secretary Silvestre Bello III matapos magdesisyon ang national government na luwagan ang quarantine classification ng Metro Manila sa Alert Level 2.

“Yung employer sasabihin kailangan ko na mag-report na kayo dahil maluwag naman mga health protocols. Palagay ko naman magkakaintindihan mga empleyado,” ani Bello sa isang panayam.

Ayon naman kay Sergio Ortiz-Luis ng Employers’ Federation of the Philippines, posibleng hindi papasukin ng mga employers ang kanilang mga empleyado dahil pa rin sa issue sa transportasyon.

“Marami riyan hindi pa rin papasukin ‘yung mga tao dahil ang may kulang hindi sila. Ang may pagkukulang ay itong nasa transportasyon,” ani Ortiz-Luis.

“Lalo sa opisina na pinaglayu-layo mo yung ano, 50% lang, edi ganun work-from-home ‘yung iba. Papasukin mo ngayon, Paano ‘yun? Maglalaki ng opisina?” dagdag niya.

7 empleyado nagka-Covid, opisina sa Davao del Norte, sarado

ni Mary Gutierrez Almirañez | May 27, 2021

Suspendido ang ilang operasyon at serbisyo sa opisina ng Santo Tomas, Davao del Norte, matapos magpositibo sa COVID-19 ang 7 government employees.

Batay sa ulat, nagsimula ang work suspension pasado ala-una ng hapon kahapon at inaasahang magtatapos bukas, May 28.

Ayon pa kay Municipal Information Officer Mart Sambalud, hindi kasama sa suspensiyon ang mga department na may kinalaman sa disaster, emergency, rescue, health, information at social services katulad ng Municipal Disaster Risk Reduction and Management Office (MDRRM), Municipal Health Center (MHC), at ang Municipal Social Welfare and Development Office (MSWDO).

Ilulunsad din ang work-from-home arrangement sa ilang department upang maiwasan ang mabilis na hawahan sa opisina.

"Queries and appointments from the public will be channeled through the Facebook pages of the various offices of the Santo Tomas LGU, public hotline directories, and other social media platforms to avoid person-to-person transmission of the virus," sabi pa ni Sambalud.

Sa ngayon ay dini-disinfect muna ang lahat ng pasilidad sa bawat department upang hindi na kumalat ang virus.