EAT BULAGA! NG TVJ SA TV5, IT'S SHOWTIME SA GMA-7

ni Julie Bonifacio @Winner | June 11, 2023

Patuloy ang balita ng rigodon ng mga noontime shows sa telebisyon. Pagkatapos layasan nina Tito Sotto, Vic Sotto and Joey de Leon ang dati nilang programang Eat…Bulaga! sa GMA-7, hayan at nababalitang ang It’s Showtime ng ABS-CBN Entertainment naman ang ookupa sa dating timeslot ng TAPE, Inc. produced program sa Kapuso Network.

But of course, isa lang ‘yan sa maraming speculations na lumulutang sa gitna ng kontrobersiyang paglipat ng TVJ sa TV5.

At kaya naging kontrobersiyal, kasi nga, humahataw pa ang It’s Showtime sa TV5, pati na sa A2Z Channel 11, iWantTFC, TFC, Kapamilya Online Live at Kapamilya Channel, tapos ay balitang biglang maeetsapuwera na sa pagpasok ng TVJ sa Singko.

Sa recent episode ng It’s Showtime ay nagulat ang madlang pipol nu’ng mag-finger heart sign ang mga hosts ng Kapamilya noontime show na sina Vice Ganda at Anne Curtis. Tapos, kinanta pa ni Vice ang jingle ng Kapuso Network.

Dahil dito, mabilis kumalat ang espekulasyon ng paglipat ng It’s Showtime sa GMA-7.

“Vice Ganda and Anne Curtis flexing the heart sign. Kapuso."

“Plot twist ng taon."

“Kung susugal ang GMA sa TAPE, aabutin pa 'yan ng taon bago makabawi. Maaapektuhan ang ibang shows at stocks nila. If kukunin nila ang It's Showtime, sure win.”

Sa true lang, may posibilidad na mapanood ang It’s Showtime sa GMA-7.

Una, may mga pag-uusap nang nagaganap between GMA-7 at ABS-CBN Entertainment para sa ilang programa pati na sa pelikula. Pangalawa, magtatapos na ang kontrata ng It’s Showtime sa TV5 on June 30. Pangatlo, kung nagawang makipag-back-to-back ng It’s Showtime sa Lunch Out Loud, keri rin nilang gawin ito sa Eat… Bulaga! sa Kapuso Network.

Magandang pre-programming ang It’s Showtime sa Eat… Bulaga! and vice-versa.

Kumbaga, walang tapon ang pananghalian ng mga televiewers.

Papayag ba ang mga Jalosjos na major shareholder ng TAPE, Inc. at siyang may-ari ng Eat… Bulaga!? Why not, kung makakatulong sa show nila, ‘di ba?

At ang mas matindi, puwede ring “pambuwisit” lang sa TVJ na iniwan ang mga Jalosjos sa ere.

“Ang weird lang siguro kung simultaneously, mag-e-air siya on rival networks but the positive changes are always welcome!” komento ng isang netizen.

Tamah! Learn to accept change dahil bahagi ng buhay ‘yan!

Juday, sagot lahat ng gastos? RYAN, WALANG SUWELDO SA EAT BULAGA!

ni Julie Bonifacio @Winner | June 8, 2023

Nagbakasyon si Judy Ann Santos kasama ang kanyang asawa na si Ryan Agoncillo at ang kanilang tatlong anak sa Japan.

Ishinare ni Juday sa kanyang Instagram ang video ng pagpunta nila sa Japan. Caption ni Juday: “Our first trip ever! Day 1 in #Osaka. We have been talking about going to Osaka, ever since the pandemic happened. Finally!! Nakaalis kami!!! Woot, woot! @ryan_agoncillo!”

Deserved ng family ni Juday ang naturang vacation sa Japan, lalo na’t katatapos lang ng panganay nila na si Yohan ng kanyang senior high school. Pagbalik from Japan, kasabay naman ito ng pagpasok ni Yohan sa kolehiyo.

Habang si Ryan ay sasabak na ulit as one of the hosts ng Eat… Bulaga! sa bago nitong TV network.

This time, sure na sure na may TF o talent fee na ang mga hosts ng EB!. Eh, kasi nga, nai-reveal na ang tagal na ‘di sumusuweldo ng mga hosts ng nasabing noontime show sa dati nilang producer.

Buti na lang talaga, financially stable na sina Ryan at Juday, kaya kahit walang natatanggap na TF si Ryan sa EB!, keri pa ring ma-sustain ang gastusin ng kanyang pamilya.

And also, napakasipag at napakaraming dumarating na projects kay Juday. Kahit pandemic, nagkaroon siya ng show sa ABS-CBN at dagsa pa rin ang endorsements niya.

While si Ryan, kahit walang ibang project bukod sa EB!, for sure, may ibang pinagkakaabalahan ang host-actor. At hindi niya pababayaan na si Juday lang ang bubuhay sa kanyang pamilya.

As I’ve said, nakapag-ipon na rin naman si Ryan nang higit pa sa sapat for his wife and children, kaya nananatiling ‘ideal couple’ hanggang ngayon sa showbiz sina Juday at Ryan.

IT’S SHOWTIME, ETSAPUWERA SA TV5 DAHIL SA TVJ

ni Julie Bonifacio @Winner | June 7, 2023

Ayaw matigil ng isyu tungkol sa pagre-resign nina Tito Sotto, Vic Sotto at Joey de Leon sa TAPE, Inc., producer ng noontime show na Eat… Bulaga!.

Ngayon nga ay may balita na rin kung saang network lilipat ang bagong noontime show ng TVJ. Ang malakas na bulong-bulungan ay sa TV5 na matutuloy ang tatlo.

Very persistent daw ang top head na si Manny V. Pangilinan na mapunta sa TV5 ang TVJ.

At balitang-balita na si MVP na ang producer ng bagong programa nina Tito, Vic and Joey.

Kaya lang, ongoing pa ang noontime show ng ABS-CBN na It’s Showtime sa TV5. Kaya ang malaking tanong ng mga showbiz insiders ay kung ano na ang mangyayari sa It’s Showtime sa pagpasok ng TVJ sa TV5?!

Until this post sa Facebook from an account name na Kapamilya Online Updates ang mabilis na nag-viral kahapon.

Ayon sa FB post, “Sa susunod na buwan ay hindi n’yo na matutunghayan ang It's Showtime sa TV5 tuwing tanghalian. Magkakaroon na lamang ng delayed telecast sa hapon.

"Samantala, patuloy nating makakasama ang It's Showtime family tuwing tanghali sa A2Z, Kapamilya Online Live, Kapamilya Channel at IWantTFC. Ano’ng say n’yo, madlang pipol?”

Dinagsa ng mga comments and replies ang nabanggit na FB post. And in fairness, valid ang kanilang mga opinyon, ha!

“Ang daming ginulo ng TVJ!”

“Kung kukunin ng TVJ ang timeslot ng It’s Showtime, parang walang utang na loob itong TV5. Sa true lang talaga.”

“Okay lang po ‘yun, may Kapamilya Channel pa naman at A2Z. Lipat na lang po, gaya namin nu’ng napabalita na sa TV5 na papasok ang Eat… Bulaga!, lipat na agad kami sa A2Z kasi ru’n po kami masaya sa It’s Showtime.”

“Okay lang, sa A2Z naman ako nanonood ng It’s Showtime at kahit saan pa sila mapunta,

papanoorin ko pa rin sila… #SOLIDSHOWTIMER!"

“Okay lang ‘yan, uso na ngayon ang smart TV, basta may WiFi ka.”

“Okay lang, may iWantTFC naman kami.”

Tama naman!