Reporma sa edukasyon at pagsasanay ng mga guro, napapanahon na!

ni Kuya Win Gatchalian - @Win Tayong Lahat | October 27, 2020

Sa kabila ng malaking hamon sa sektor ng edukasyon ngayong new normal, dapat siguruhing may sapat na kaalaman, pagsasanay at kahandaan ang mga guro na naaangkop sa pangangailangan ng mga mag-aaral upang maiangat din ang kalidad ng edukasyon na natatanggap ng mga bata.

Bilang Chairman ng Senate Committee on Basic Education, Arts and Culture, inihain ng inyong lingkod ang panukalang-batas na Senate Bill No. 1887 upang mas mapahusay pa ang kalidad ng edukasyon ng mga guro sa pamamagitan ng mga reporma sa Teacher Education Council o TEC. Matatandaang nabuo ang TEC noong 1994 sa pamamagitan ng Republic Act No. 7784 upang i-angat ang kalidad ng edukasyon ng mga guro sa bansa.

Layon ng naturang panukala na amyendahan ang kasalukuyang batas upang mas mapatatag ang TEC at magkaroon ng mas maayos na koordinasyon sa pagitan ng Department of Education (DepEd) at Commission on Higher Education (CHED).

Napapanahong suriin ang kalidad ng edukasyon ng mga guro kasunod na rin ng mababang passing rate ng mga kumuha ng Licensure Examination for Teachers (LET) nitong nagdaang mga taon. Halimbawa, mula 2014 hanggang 2019, ang average passing rate sa LET ng mga guro sa elementary level ay wala pang tatlumpung porsiyento at wala pang apatnapung porsiyento naman sa secondary level.

Ito marahil ang malaking dahilan kung bakit sa 79 na bansa, ang mga mag-aaral natin ang nakakuha ng pinakamababang marka sa Reading Comprehension at pangalawang pinakamababa sa Science at Mathematics sa 2018 Programme for International Student Assessment o PISA.

Sa naturang panukalang batas, maihahanda ang mga guro bago sumabak na magturo sa klasrum sa pamamagitan ng pagsasanay o ang tinatawag na pre-service education.

Sa ilalim ng panukalang-batas, ang TEC ang magbibigay ng accreditation sa mga programa para sa edukasyon ng mga guro upang masigurong angkop ang mga ito sa mga tinatawag na professional standards na dapat aprubado ng DepEd at TEC. Kapag naisabatas ito ay imamandato sa TEC ang pagsuri sa mga Teacher Education Institutions o TEIs.

Isinusulong din ng panukalang-batas ang pagkakaroon ng iba’t ibang tanggapan ng TEC para mas patatagin ang sistema ng naturang programa. Isa na rito ang Research and Training Office na magsasagawa ng mga pananaliksik. Magiging bahagi na rin ng TEC ang mga pinuno ng Technical Education and Skills Development Authority (TESDA), National Economic and Development Authority (NEDA) at ang Philippine Normal University (PNU) na tinaguriang national center for teacher education.

Dahil sa mga naging pinsala ng kasalukuyang pandemya, ipinapanukala rin natin na kailangang maglatag ng plano ang TEC para matiyak ang pagpapatuloy ng edukasyon sa tuwing may krisis at sakuna, kabilang na ang pagtataguyod sa kapakanan ng mga guro at school heads.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Paggamit ng telebisyon para mas mapalawak ang distance learning, oks!

ni Kuya Win Gatchalian - @Win Tayong Lahat | October 20, 2020

Noong nagbukas ang klase at naglibot tayo sa ilang mga bahay sa Valenzuela, kapansin-pansing masyado palang komplikado ang ilang aralin na nasa self-learning modules (SLMs).

Isang halimbawa rito ang subject na Geometry o kaya ay Trigonometry na ginagamitan ng tahasang pagko-compute. Mas marami mang mag-aaral ang gumagamit ng SLMs para sa distance learning o halos 60 porsiyento sa 22 milyong mag-aaral sa mga pampublikong paaralan, kailangan pa rin ng mas malawakang paggamit ng telebisyon lalo na sa pagtuturo ng mga mahihirap o masalimuot na aralin.

Sa telebisyon, malaki ang maitutulong ng maingat na paggabay ng mga guro sa kanilang mga mag-aaral sa pamamagitan ng video para mas madaling sundan ang paksa at maintindihan agad ng mga bata.

Ayon sa pag-aaral ng global data firm na Dataxis, may halos 19 milyong sambahayan ang may telebisyon. Noong nakaraang Agosto, naglabas ng datos ang Department of Education (DepEd) na may anim na milyong tahanan ang walang internet.

Ibig sabihin, tiyak na mas maraming mag-aaral ang maaabot ng telebisyon kung ito ang

gagamitin sa distance learning. 

Inilunsad na ng DepEd ang DepEd TV na umeere ng mga K to 12 subjects mula Lunes hanggang Sabado mula alas-siyete ng umaga hanggang alas-siyete ng gabi. Napapanood ang DepEd TV sa mga istasyong may ugnayan sa DepEd tulad ng Intercontinental Broadcasting Corporation (IBC-13) at People’s Television Network (PTV-4).

Nais din nating bigyang-diin ang kahalagahan dito ng pakikipag-ugnayan ng mga local

government units (LGUs) sa mga lokal na istasyon ng telebisyon at radyo at pagpapalawig ng ganitong mga ugnayan para matiyak na maaabot ang lahat ng mga bata sa mga komunidad sa buong bansa.

Ngunit dapat mapaalalahanan ang DepEd na suriing mabuti ang mga pinalalabas na mga aralin para makaiwas sa anumang pagkakakamali.

Bukod dito, muli nating hinihimok ang mga telecommunication companies na siguruhing maging maayos ang internet connectivity upang maiwasan ang mga problema sa online learning. 

Sa Valenzuela, ang gamit ay Facebook Live para sa pagtuturo o ang tinatawag na ‘Valenzuela Live Online Streaming School.’ Ngunit kahit na umeere sa Facebook ang iba’t ibang aralin, mayroon pa ring mga mag-aaral na hindi nakakapanood ng mga leksiyon dahil nga sa problema

sa internet.

Bilang chairman ng Senate Committee on Basic Education, Arts, and Culture, labis nating

hinihikayat na mapahusay pa ang platapormang ito para sa distance learning.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Mga nahinto sa pag-aaral, may chance pang maabot ang pangarap sa tulong ng ALS!

ni Kuya Win Gatchalian - @Win Tayong Lahat | October 15, 2020

Magandang balita! Naratipikahan na ang bicameral conference committee report ng panukalang-batas na layong magpapaigting sa pagpapatupad ng Alternative Learning System (ALS) sa bansa. Ibig sabihin, pirma na lang ni Pangulong Rodrigo Duterte ang kulang para maging ganap na itong batas.

Ito ay hakbang upang lalo pang maabot ang milyun-milyong Pilipino na hindi nakapagtapos ng pag-aaral, kasama na ang mga ‘out-of-school children in special cases’ — sila ang mga batang nasa tamang gulang para makapag-aral, ngunit hindi makapasok sa mga paaralan dahil sa mga sagabal na dulot ng ekonomiya, kultura at iba pang kadahilanan.

Kabilang dito ang mga mag-aaral na may kapansanan, Indigenous Peoples, ‘yung mga tinaguriang ‘children in conflict with the law’ at iba pang mga kabilang sa tinatawag na marginalized sectors.

Kung ihahambing natin ito sa pormal na sistema ng edukasyon na mayroong nakatakdang oras ng pagtuturo ang mga guro, ang ALS ay may tinatawag na ALS Teachers, Community ALS Implementors at Learning Facilitators na sumasadya sa mga komunidad para magturo lalo na sa mga nakatira sa malalayong lugar, conflict-affected communities at mga komunidad na nasa emergency situations. Magtatatag din ng sariling ALS Community Learning Centers o ALS CLCs ang bawat lungsod at munisipalidad sa bansa.

Sa pag-aaral ng World Bank, lumalabas na 24 milyong Pilipino na may edad 15 pataas ang hindi nakapagtapos ng high school, habang mahigit dalawang milyong batang may edad lima hanggang 14 ang hindi nag-aaral.

Napakahalaga ng papel ng ALS sa pagbangon ng sektor ng edukasyon lalo na’t malaking pinsala ang naidulot ng pandemya.

Saludo tayo sa mga hindi sinusukuan ang pag-abot sa kanilang pangarap. Mas matimbang ang kanilang determinasyong makapagtapos ng pag-aaral at maiahon sa kahirapan ang sarili at ang pamilya kaysa sumuko at mawalan na lang ng pag-asa. Nitong mga nagdaang taon ay personal nating nasaksihan ang ganitong magandang pananaw, kabilang na sa ating mga kapwa-Valenzuelano.

Kumakayod sila dahil hindi sapat ang kanilang pantustos para sa mga pangunahing pangangailangan ng pamilya, independenteng namumuhay sa murang edad pa lang dahil inabanduna o walang kinikilalang mga magulang na tutulong sa kanila, may sakit ang isang miyembro ng pamilya, nagdadalang tao o may binubuhay na bata, at marami pang iba.

Iisa ang kanilang hangarin—makamit ang edukasyon sa kabila ng iba’t ibang mga hadlang.

Sa pamamagitan ng ALS, mas madali nating maaabot at mabibigyan ng dekalidad na edukasyon ang bawat mamamayang Filipino na napagkaitan ng pagkakataong tapusin ang kanilang pag-aaral.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com