Angkop at sapat na bilang ng evacuation center sa bawat sulok ng bansa, dapat lang!

ni Kuya Win Gatchalian - @Win Tayong Lahat | November 05, 2020

Tuwing may sakuna na lang sa bansa, ang mga paaralan ang kadalasang ginagawang evacuation centers.

Kung hindi distance learning ang sistema ng edukasyon ngayon, tiyak na apektado ang pag-aaral ng mga bata dahil sa kanilang mga silid-aralan nananatili ang mga inilikas na pamilya dulot ng Bagyong Rolly at ng mga iniulat na sunog sa iba’t ibang komunidad kamakailan.

Panahon na para isantabi ang nakagawian nating pagpapatuloy ng mga evacuees sa mga eskuwelahan.

Mahalagang pag-aralang maigi ang mga diskarte sa emergency preparedness. Sa dami ng bilang ng tumatamang bagyo sa bansa taon-taon, kailangan nating isaalang-alang ang pagkakaroon ng maayos at permanenteng evacuation centers na matutuluyan na hindi matitinag ng malalakas na bagyo at hindi makakaantala ng pag-aaral ng mga kabataan at mga gawain ng ating mga guro sa paaralan.

Ang panukalang-batas na inihain ng inyong lingkod na Senate Bill No. 747, o ang Evacuation Center Act ay naglalayong magtatag ng mga ligtas na matutuluyan o evacuation centers sa lahat ng munisipyo at mga lungsod na karaniwang nasasalanta ng mga bagyo, lindol at iba pang kalamidad.

Ating ipinapanukala na dapat may sapat na pasilidad ang mga evacuation centers na ito at siguruhing hindi siksikan ang mga residente para masiguro ang health and safety protocols ngayong may pandemya.

Bukod sa maayos na suplay ng tubig at kuryente, kasama sa mungkahi natin ang pagtatalaga ng maayos na lugar para sa tulugan, kainan, palikuran, lutuan, labahan, clinic at isolation area para sa mga taong may mga nakahahawang sakit at sapat na lugar para sa mga alagang hayop.

Nakapaloob din sa naturang panukala na bibigyan ng prayoridad ang mga local government units (LGUs) na karaniwang nasasalanta ng kalamidad at walang sapat na ligtas na evacuation center base na rin sa pagsusuri ng National Disaster Risk Reduction and Management Council (NDRRMC).

Ginhawa, kaayusan, seguridad at pag-iwas sa sakit ang ating hangad kaya nais nating maisulong ang pagkakaroon ng angkop at sapat na bilang ng evacuation center sa bawat sulok ng bansa.

Bigyan natin ang apektado nating mga kababayan hindi lamang ng dignidad kundi kapanatagan ng loob sa gitna ng mga kalamidad. Kung may mga maayos na pasilidad, mas madali natin silang mahikayat na lumikas kung kinakailangan para masiguro ang kanilang kapakanan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Pagwawasto sa maling learning materials, gawing mabilis at maayos!

ni Kuya Win Gatchalian - @Win Tayong Lahat | November 3, 2020

Sa pagpapatuloy ng edukasyon sa panahon ng pandemya ng COVID-19, hindi lamang ang paraan ng pagtuturo ang dapat nating tutukan. Kailangang siguruhin din natin na tama ang mga araling itinuturo sa kabataang mag-aaral. Upang matiyak natin ito, hinihimok ng inyong lingkod ang Department of Education (DepEd) na paigtingin ang pagrepaso sa kalidad ng learning materials na ginagamit para sa distance learning.

May ilang beses na ring tinawag ang atensiyon ng DepEd dahil sa mga pagkakamaling nakikita sa mga learning materials nito. Kung inyong matatandaan, may ilang episodes ng DepEd TV ang nag-viral dahil sa mga nakitang pagkakamali.

Mula Oktubre 12 hanggang 20, higit kuwarenta na ang mga pagkakamali na naiulat sa proyektong Error Watch ng DepEd. Halos karamihan dito ay local modules na hindi nasuri ng kagawaran.

Ayon sa DepEd, naiwasto na ang ilan sa mga pagkakamaling ito at nakikipag-ugnayan na rin sila sa volunteers at mga katuwang sa sektor ng akademya upang matiyak ang kawastuhan ng mga aralin.

Ngunit kahit na nakakatulong ang proyektong Error Watch sa pagwasto sa mga aralin, naninindigan tayo na dapat naiwawasto na agad ang mga aralin bago ipamahagi sa mga mag-aaral at makaiwas sa kalituhan.

Bukod dito, dapat ding paigtingin ang pakikipag-ugnayan ng mga eksperto sa mga lokal na tanggapan ng DepEd, lalo na’t karamihan sa mga naitalang pagkakamali ay mula sa mga ginawa ng kanilang field units.

Ang pagkakaroon ng de-kalidad na learning materials ay dapat maging bahagi ng pagbangon ng sektor ng edukasyon mula sa pinsalang dulot ng pandemya.

Naniniwala tayong makatutulong ang ating panukalang magdagdag ng mga tinaguriang center for excellence para sa teacher education sa paglikha ng de-kalidad na learning materials.

Nakasaad sa Republic Act No. 7784 na layong i-angat ang kalidad ng edukasyon ng mga guro sa bansa sa pamamagitan ng pagtatatag ng Centers of Excellence at pagbuo sa Teacher Education Council. Isa sa mga tungkulin ng center of excellence ay magsilbing sanggunian sa paglikha ng iba’t ibang materyales para sa pagtuturo.

Ang problema — sa 1,600 na Teacher Education Institutions (TEIs), 74 lang ang maituturing na mga center of excellence o development.

Inaasahan natin ang mabilis at maayos na pagtugon sa suliraning ito sa lalong madaling panahon.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Edukasyon ang dapat prayoridad ng kabataan, hindi pagbubuntis o pag-aasawa

ni Kuya Win Gatchalian - @Win Tayong Lahat | October 29, 2020

Malaki ang epekto na idinudulot ng pandemya sa iba’t ibang sektor at industriya ng ating lipunan. Higit sa lahat, ang seguridad at kinabukasan ng kabataan ay labis ding nalalagay sa panganib.

Kasabay ng pagtugon at pagbabantay sa pagpapatakbo ng distance learning ngayong taon, tinututukan ng inyong lingkod bilang Chairman ng Senate Committee on Basic Education, Arts and Culture ang pinangangambahan ng mga eksperto na maaaring umakyat ang bilang ng mga child marriages bunsod ng pandemya.

Base sa ulat ng international charity organization na Save the Children, maaaring umabot sa 2.5 milyong mga batang babae ang nanganganib na mapilitang magpakasal dahil sa mga naging epekto ng pandemya, kasama na ang pagkakaantala ng kanilang edukasyon at ang pagbagsak ng ekonomiya.

Noong Abril ay nagbabala ang United Nations Population Fund o UNFPA na maaaring magdulot ng karagdagang 13 milyong mga child marriages sa susunod na dekada dahil sa mga naging pinsala ng pandemya.

Ayon naman sa United Nations Children’s Fund o UNICEF, ang Pilipinas ang pang labindalawa sa may pinakamataas na bilang ng mga child brides sa mundo.

Dapat itaas ang kasalukuyang age of sexual consent sa bansa na 12 taong gulang bilang bahagi ng pagsugpo sa maituturing na paglabag sa karapatang pantao. Ang Pilipinas ang may pinakamababang age of sexual consent sa Asya at pangalawang pinakamababa naman sa buong mundo.

Sa Senate Bill No. 739 o ang “Increasing the Age for Determining Statutory Rape,” ipinanukala ng inyong lingkod na itaas sa 18 ang edad ng sexual consent.

Kamakailan ay inaprubahan na sa committee level ng Senado ang panukalang i-angat ang age of sexual consent sa edad 16.

Naniniwala tayong ang pag-angat ng age of sexual consent ay makatutulong sa pagsugpo sa mga pang-aabuso at karahasang seksuwal na dulot ng child marriages o ang pagpapakasal ng menor-de-edad.

Nais din nating bigyang-diin ang kahalagahan ng pagpapatuloy ng mga programang nagbibigay ng proteksiyon sa kabataan, kabilang na ang mga reproductive health services.

Kasama rin dito ang pagbibigay ng prayoridad sa comprehensive sexuality education dahil ayon sa ulat ng Annual Poverty Indicators Survey 2017, para sa mga kababaihang may edad na anim hanggang 24, ang mga usaping pagpapamilya at pagpapakasal ay ang pangunahing dahilan ng pagkaantala o hindi pagpapatuloy ng kanilang pag-aaral.

Edukasyon ang dapat pangunahing pinagtutuunan ng pansin ng ating kabataan at hindi pagbubuntis o pag-aasawa. Hindi maaaring maputol na lang ang kanilang pangarap dahil napipilitan silang magpakasal at magkaroon ng responsibilidad sa pamilya nang maaga.

Ngayong nasa gitna tayo ng krisis, lalo natin dapat paigtingin ang mga hakbang laban sa anumang uri ng karahasan at pang-aabuso sa mga kabataan.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com